27.01.2020 Шоу-бизнес

Динә Латыйпова: “Рафаэль кофега да бал кушып эчә”

– Сәламәтлек какшаса, беркайчан да антибиотиклар, көчле дарулар кулланмыйбыз, халык чараларын файдаланабыз. Бал, имбир, лимон, кара карлыган, мәтрүшкә, төрле үлән яфраклары – безнең дарулар шушы.

Соңгы арада гел мүк җиләге (клюква) кулланабыз. Краннан агып торган салкын суда яхшылап юып, кашык белән изәм. Кайвакыт тукмак белән дә изәм. Шуңа бал кушып болгатып куям. Бал эреп, мүк җиләгенең суын чыгара. Иммунитетны ныгытыр өчен файдалы чара бу. Балны бик яратабыз. Рафаэль кофега да шикәр комы кушмый, бал сала.

Организмны авырулардан саклый торган тагын бер чара белән бүлешәм. Урманнан җыелган нарат ылысы (язга таба җыелганы бигрәк тә әйбәт), сары суган кабыгы һәм гөлҗимешне чама белән алам. 1 литрлы термоска 1 уч юылган нарат ылысы, ярты учтан әзрәк суган кабыгы һәм изелгән яки туралган гөлҗимеш салабыз. Өстенә кайнап чыккан су коеп, 2 сәгатькә куеп калдырабыз. Без кичтән ясыйбыз да икенче көнне рәхәтләнеп эчеп йөрибез. Бу чара канны чистарта, диләр. Без моны кулландык, файдасын күрдек. Тик шунысы бар – аппетитны ача, чамалап эчәргә кирәк.

Шикәр авырулы кешеләргә киңәшем: көнбагыш төнәтмәсе эчегез. Кыздырылмаган бер уч көнбагышны яхшылап юып, термоска салыгыз да өстенә кайнар су коегыз. Бик файдалы.

***

Язма "Акчарлак" газетасының архив саннарыннан алынды, 7 февраль 2019 № 5

---
Матбугат.ру
№ --- | 27.01.2020