07.11.2019 Мәдәният

"Кичә соңгы ролен уйнады...": Казанда танылган актер Александр Купцов вафат (ХУШЛАШУ УРЫНЫ ҺӘМ ВАКЫТЫ)

2019 елның 6 ноябрендә Казанда 65 нче яшендә Россия Федерациясенең атказанган артисты, Татарстан Республикасының халык артисты, Казан дәүләт яшь тамашачы театры артисты Александр Иванович Купцов вафат булды. Александр Иванович югары актерлык осталыгына һәм искиткеч талантка ия шәхес, дип хәбәр итә театр коллективы.

Актив, принципиаль, интеллигентлы – аны хезмәттәшләре әнә шундый дип белә һәм хәтерли. Ул тамашачылар арасында мәхәббәт һәм ихтирам яулаган зат.

Александр Иванович Купцов 1955 елның 25 февралендә Казанда туган. 1979 елда Казан театр училищесын тәмамлый.

Шул ук елны артист Казан яшь тамашачылар театры сәхнәсендә беренче ролен башкара.

"Матбугат.ру"га билгеле булганча, Александр Иванович Казан яшь тамашачылар театрында хезмәт итеп кенә калмыйча, кинода да төшкән. Ул яшь буын актерлар өчен профессиональ яктан үрнәк.

Кичә Александр Иванович "Кечкенә принц" спектаклендә үзенең соңгы ролен уйнаган.

Казан дәүләт яшь тамашачы театры администрациясе һәм коллективы актерның туганнарының һәм якыннарының тирән кайгысын уртаклаша.

Артист белән хушлашу 2019 елның 9 ноябрендә (шимбә) 9:00 сәгатьтән 11:00 сәгатькә кадәр Казан яшь тамашачылар театры бинасында (Островский ур., 10 йорт) узачак. Александр Иванович Купцов Салмачы бистәсе зиратында җирләнәчәк.

---
Матбугат.ру
№ --- | 07.11.2019