27.10.2019 Шоу-бизнес

"Хуҗасыз баян сыкрап күңелне китеп алды": Шәфәгать Салихов вафатына бер ел

Бүген танылган баянчы Шәфәгать Салихов вафатына бер ел. Узган елның 27 октябрендә ул Казан-Чаллы трассасында авариягә очрап, фаҗигале төстә һәлак булды. Быел Шәфәгать абыйга 60 яшь тулган булыр иде.

Чаллы шәһәрендә яшәп иҗат иткән Шәфәгать Салихов татар тамашачысына Салават Фәтхетдиновның беренче баянчысы буларак мәгълүм. Аның уйнавына кушылып, Салават Фәтхетдинов "Урсал тауда", "Әнкәмнең догалары" җырларын башкарды.

"Матбугат.ру"га билгеле булганча, Әгерҗе районында гомер итүче, үзе дә, улы Илшат та заманында легендар баянчы белән бер сәхнәдә чыгыш ясаган шагыйрә "Уразай сандугачы" буларак билгеле Тәнзилә Хәбибуллина Шәфәгать Салиховка багышлап "Сагынабыз, юксынабыз" дигән шигырь багышлаган.

Якын иде Шәфәгатьнең

Моңнары да, үзе дә.

Шуңа күрә сагынабыз

Юксынабыз бүген дә.

Сәхнәгә чыгып басса

Кояш иде яктырткан.

Татар халкы арасында

Баянчы иде дан тоткан.

Җан җылысы, йөрәк хисе

Тарала иде залга.

Юксынып яшибез аны

Киткәндәй бары ялга.