29.09.2019 Шоу-бизнес

Илсөя Бәдретдинова: "Әни, туйдым инде, дип елый идем"

Социаль челтәрләргә берегеп беттек инде, җәмәгать! Йокыдан уянуга, беренче эш итеп, кулга телефон алабыз. Дөнья яңалыклары, кем ничәдә торган, кемнең кызы нишләгән, кем күпме акча эшләгән – барысы да шунда. Татар йолдызларының да социаль челтәрләрен актарып чыктык. Хәйран кызык мәгълүмат бар икән.

Ләйсән МӘХМҮТОВА: «Безне ашатырлар микән, дип кайгыра бөтен артистлар. Ничәшәр сәгать автобуста, самолетта, поездда килеп, тиешле урынга барып җиткәч, ашатмаска да мөмкиннәр. Киресенчә, юлдан талган, алҗыган артистларны экскурсиягә алып чыгып китәләр. «Кунакханәдә әлегә урыннар юк. Барыгыз, шәһәрне карагыз» дип иртәнге сәгать 4тә урамга чыгарып җибәргән очраклар да күп булды. Тыштан гына матур шул «әртисләр» тормышы. Сәхнәдә ялтыр-йолтыр килеп торган күлмәкләр мәңгелек бәйрәмгә охшаган. Ә шул сәхнәгә менәр өчен күпме көч кирәк. Ашадыңмы, йокладыңмы дип сораучылар булмаска да мөмкин. Акчаны көрәп аласыз, үзегезгә аласыз дигәннәре дә бар. Ә бит артист – юл кешесе. Артистлар – халык күңелен күтәрүче дәрвишләр».

Ландыш НИГЪМӘТҖАНОВА: «Кияүгә чыгарга кирәк, – диде бер таныш кыз.

– Ләкин ул кеше бик әйбәт булырга тиеш, бай, чиста, пөхтә, юмарт булырга тиеш. Яратырга, хөрмәт итәргә, мин нәрсә әйтсәм, шуны эшләргә тиеш. Ул көнләшмәсен дә, мине дә алдамасын… Һәм башкалар.

– Ә син? Ашарга да пешерә белмисең бугай?

– Әй, өйрәнермен әле.

Без үскәндә безне эш рәтен белмәсәң, кияүгә алмыйлар сине, дия торганнар иде. Ә мин хәзер кызыма шулай дим. Әлегә аптырап карый, ләкин инде тырыша башлады. Тырышыгыз, кызлар».

Илсөя БӘДРЕТДИНОВА: «Бәләкәй чакта әни миңа әкият сөйли иде. «Яшәгән ди, булган ди әби белән бабай. Сарайларының башын сумала белән япкан булганнар икән. Шунда саескан килеп кунган. Ул башын алса, койрыгы ябыша икән, койрыгын алса – башы, башын алса – койрыгы. Башы… Койрыгы…». Әни, туйдым инде бу саесканнан, дип елый идем. Әни, мәрхүмкәем, үзе йоклый, үзе дәвамын сөйли: «Тагын ул әби белән бабайның келәтләре булган. Келәтләре булган ди таштан. Сөйлимме яңа баштан?» Сөйлә дияргә курка идем, чөнки тагын теге саесканны сөйли башлый.

ИРКӘ: «13-14 еллар элек әкрен генә Академик Парин урамы тукталышына атлаганда, таякка таянган, әз генә бөкресе калыккан бер карчыкны күреп алдым. Әз генә куркып, сискәнеп куйсам да, аңа сиздермәс өчен күзенә карап елмайган караш ташладым. Әби туп-туры миңа тирән салкынрак караш белән туктап карап тора башлады. Сискәндем. Атлавымны дәвам иттем. Тик шулчак карчык нык итеп кулымнан тотып алды. Каян белгәндер татар кызы булуымны, татарча берничә җөмлә тезде: «Син гөл, тик энәле, кактус син». Матуррак гөл белән чагыштырып булмый микән, дип шаяртырга авызымны ача башлаган идем, әби тагын усал итеп карап куйды. «Кактус ул эссе чүлдә әллә күпме сусыз да яши ала, матурлыкка кызыкма, бала, әле чәчәк атачаксың алдагы елда», диде дә, кулымны җибәрде. Белмим, ни өчен туктаткандыр мине, шул сүзләрне әйтер өчен микән? Андый әйберләргә мин ышанмыйм. Тик шулай да истәлек булып күңелдә сакланып калган.

Рамил ШӘРӘПОВ: «Ялларда гаиләмне авылга кайтарып куйган идем. Казанга китәргә җыенып ятам. Берзаман кызым Линара бакчага кереп китте дә, тавык күтәреп килгән. «Әти, анда Казандагы өйдә күкәй бетте. Мә алып кайтып куй әле, сала торсын», ди. Көлдерде. Хатын-кызлар кечкенәдән шундый гаилә җанлы булып үсәләр ахры ул, әйеме?

Рәйдә НИГЪМӘТҖАНОВА әзерләде, Безнең гәҗит

---
Матбугат.ру
№ --- | 29.09.2019