Туган телен яклаучы активист парламент каршында үз-үзенә ут төрткән

Альберт Разин Удмуртия Дәүләт шурасы янына үзе белән шигарләр язылган плакат алып килгән. Анда шагыйрь Рәсүл Гамзатовның "Иртәгә минем телемне онытсалар, мин бүген үләргә әзер", дигән сүзләре дә булган дип хәбәр итә "Коммерсант-Удмуртия".

 

Вакыйганың шаһиты сүзләренчә, Разин битлек һәм берничә кат кием кигән, ә киеменнән ниндидер сыекча агып торган һәм ул кинәт яна башлаган. Узып баручы машина йөртүчеләр аны сүндерергә тырышкан, әмма ялкын көчәйгән генә. Ашыгыч ярдәм машинасы 15 минуттан килгән.

 

Беренчел мәгълүмәткә караганда, Разин хәзер үтә авыр хәлдә. Кайбер телеграм-каналлар активистның үлеме турында да хәбәр итә.

 

Тикшерү комитеты әлеге хәлне тикшерү эше башлаган.

 

​Удмуртия дәүләт шурасының 10 сентябрьгә планлаштырылган утырышы башка көнгә күчерелән.

 

Альберт Разин 1940-нчы елгы. Удмуртиянең атказанган фән эшлеклесе, философия фәннәре кандидаты, социолог, доцент. Разин удмурт хәрәкәте активисты, балалар удмурт телен өйрәнсеннәр һәм аны онытмасыннар өчен көрәшә. Элегрәк ул депутатларга “Удмурт халкы юкка чыгып бара. Аны коткару сезнең кулда” дип мөрәҗәгать иткән булган.