"Разил Вәлиев җөмлә саен шулай сөйләште. Данил Гыйниятов та еш куллана"

 

Телевизор ачсаң татарча тапшыруларда җөмлә саен шушы ике сүзне бергә куеп сөйлиләр. Иң га­җәбе — милли мәсьәлә­ләргә кагылышлы һәм тел буенча тапшыруларда да. Күптән түгел “Таяну нок­тасы”нда хөрмәтле шагыйрь, Дәүләт Советында милли мәсьәләләр өчен җаваплы Разил абый Вәлиев җөмлә саен шулай сөйләште. “Ком сәгате” тапшыруында Данил Гыйниятов та еш куллана, “Манзара” тапшыруында мәгариф бүлекләреннән килгән тел белгечләре гел шул ике сүзне бергә әйтәләр. Югыйсә, алар югары белемле, галим, профессор һ.б. бит инде. Дин әһелләре дә еш кабатлый бу сүзләрне. “Кәмит җәвит” тә аларсыз үтми.

 

Берничә ел элек сезнең газета битләрендә бер татар теле һәм әдәбияты укытучысы бу ике сүзне берничек тә бергә куллану ярамавын, шуның кагыйдәсен аңлатып язып чыккан иде. Шуңа да карамастан, әле киресенчә дә, бу сүзләр еш­рак та яңгырый башлады. Йогышлы чир кебек таралды.

 

Профессор Рүзәл Йосыпов “Мәдәни җомга” газетасының 5 июль санындагы язмасында “республика җәмәгатьчелеге авыр югалтуга дучар булды” дигәнне “зур югалтуга дучар булды” дияргә кирәклеген әйтә. ә шушы ук санның дүртенче битендә, Аманулланың вафаты уңаеннан бирелгән язманың беренче җөмләсендә үк шушы хатаны язып куйганнар. Никадәр игътибарсызлык!

 

“Халкым минем” тапшыруында Ләйсәнә Садретдинова, урысчадан турыдан-туры тәрҗемә итеп, “халкым кайда гына яшәмәсен” ди. “Халкым кайда гына яшәсә дә” дияргә кирәк бит. “Яшәмәсен” булгач, яшәмәү була бит инде ул.

 

Бу тапшырулар барысы да әйбәт, барысы да кирәк әлбәттә. Безне 3 миллион татар карый, безне бөтен дөнья карый диләр бит. Шуңа күрә дөрес сөйләшсеннәр иде.

 

Мин югары белемле дә, тел белгече дә түгел, мәктәпне тәмамлавыма да 50 ел була. Хаталарым булса, гафу итәрсез.

 

В.ИСЛАМОВА. Азнакай.

Фото: пиксабай