Хафиз Миргалимов: "Миңа сайлаудан соң Павел Грудинин язмышы көтә диючеләр булды"

Моңа кадәр Телеграм-каналларда Хафиз Миргалимовның эштән китү турында гариза язуы, ләкин Геннадий Зюгановның моны кабул итмәве турында хәбәрләр чыккан иде. Шул уңайдан җомга Хафиз Миргалимов журналистларны җыйды. "Бу кара пиар, махсус операцияләр. Берсе дә барып чыкмаячак. Кемгәдер безнең процентларны киметү, фирканең Татарстан рескомында тотрыклылыкны какшату кирәк" диде Миргалимов.

 

"Мине эштән алу президиум вәкаләтендә. Мине күп тапкыр эштән алырга теләделәр. Ни өчен бу эшләнә? Миңа сайлаудан соң Павел Грудинин язмышы көтә диючеләр булды" диде Миргалимов.

 

Алга таба фирканең пленум утырышы узачак. Анда Миргалимов үзе өчен мөһим карар кабул итәчәген әйтте. Ләкин бу аның реском башлыгы вазифасыннан китүенә бәйлеме - әйтелмәде.

 

"Мин карар кылдым. Кичә фирка җитәкчелеге белән сөйләштем. Пленум, президиум хәл итәр" диде ул.

 

Миргалимов шулай ук Мәскәүдә карар кабул ителсә, китәргә әзерлеген дә әйтте. "Мәскәүгә барып кайтачакмын. Китәргә уйлаганыгыз бармы дисез? 15 ел дәвамында болай эшләү сәламәтлеккә дә йогынты ясый. Кайчан да булса китәргә кирәк. Кемдер бу вакыйганы тизәйтергә тели. Әгәр Мәскәүдә карар кабул итсәләр, мин китәргә әзер", диде Миргалимов.

 

Матбугат очрашуы барышында Русия коммунистлары фиркасе вәкиле чыгып "Ялган сөйлиләр!" дип кычкырды. Һәм Миргалимов янына таба барып, өстәлендәге микрофонны кулына алды. Активистны көч кулланып кына туктаттылар.

 

Татарстан Дәүләт шурасы сайлавына КПРФ фирка исемлегеннән 30 намзәт, бер мандатлы бүлгеләрдән 46 намзәт тәкъдим итте. Сайлау 8 сентябрьдә узачак.