13.06.2019 Шоу-бизнес

Яшь җырчы Динара Рәхимова: "Үз тиңемне көтәм..."

Яшь җырчы Динара Рәхимова Мәскәүдә яшәп иҗат итә. Җырлар байлыгын шактый туплаган. Үзе дә көйләр, җыр текстлары яза. Динара — Казанда еш кунак...

— Динара, тумышың белән кайсы яктан?

— Мәскәү кызы мин. Монда тудым, яшим, эшлим. Әти-әнием — Түбән Новгородтан. Яшьлек елларында Мәскәүгә күченгәннәр, хәзер дә шунда яшиләр. Балачагым күбрәк әти-әнинең туган ягында узды...

— Җырга, сәнгатькә мәхәббәт кемнән килә?

— Мин — җыр дөньясында кайнап үскән бала. Әтием Зиннур Рәхимов — баянчы. Ул минем өчен сәнгатьне ачты. Бертуган апам Эльнара Ганиева миннән алдарак җырлый башлады. Ул да — иҗади кеше.

— Яшьләргә эстрадада җиңел түгел. Нинди кыенлыклар белән очрашырга туры килә? Кемнәр белән эшлисең?

— Әйе, эстрадада көндәшлек зур. Тик беркайчан да башка артистларга карамыйм. Һәркемнең үз иҗаты, үз карашы бар. Җырчы буласың килсә, беренче чиратта, чын күңелеңнән җырларга кирәк. Нәтиҗәгә ирешү өчен, үз җырларым, көчем, тырышлыгым белән барам.

Музыкаль стиль белән шөгыльләнүче саунд-продюсерым, образларымны кайгыртучыларым, биюче төркемнәрем бар. Тик продюсерым юк, үземә үзем хуҗа булып торам...

— Кияүгә чыкмадыңмы әле?

— Әле егетем дә юк (көлә). Вакыты җитмәгәндер, сәгате сукмагандыр, дип уйлыйм. Үз тиңемне көтәм. Аның образын күз алдына китерәм...

Лилия ЙОСЫПОВА
Ирек мәйданы
№ --- | 13.06.2019