"Замяли вопрос, Сөбханалла... Конфликт исчерпан, Машалла..."

"Утлы шоу, хитлар, көтелмәгән образ, ялкынлы күренешләр һәм моңа кадәр булмаган тамаша" дип "Болгар" радиосында яңгыраган рекламасы гына да интрига тудырган бу шоу чынлап та, гадәти генә концерт булмады. Тамашачыларны күп сөйләп, артыгын җырлап, көчләп кул чаптырып ялыктырмыйча, һәр чыгыш саен таң калдырып, күңелле ял бүләк итте бу кичә. Һәр бүлекне ачып җибәргән шоу-биюләр, баян, курай, кубыз кебек милли уен кораллары ансамбле чыгышлары тамашаны затлы бәйрәм итте. 

 

Концертта татар эстрадасының популяр артистлары Илсөя Бәдретдинова, Рәсим Низамов, Резидә Шәрәфиева, Ришат Фазлыйәхмәтов, ИлСаф, Венера Ганиева, Зөфәр Хәйретдинов, "Казан егетләре", Рафинә Ганиуллина, Гөлназ Асаева,  Илмира Нәгыймова, Рөстәм Закиров, Алинә Шәрипҗанова һәм Эльмир Низамов, Илназ Сафиуллин, Рамил Шәрәпов, Закир Шаһбан, Салават Миңнеханов һәм Гүзәлем, “Казан егетләре”, Илнар Миранов, Айдар Рәкыйпов, Алсу Фәракшина һәм Айнур Сөләйманов дуэты катнашты. 

 

Беренче сюрприз тамашачыларның залга кереп утыруга концерт программасы белән танышуы булды. Алдан ук һәр урындыкка җырчылар, җырлар һәм җыр авторлары исемнәре язылган буклетлар куелган иде. Шул рәвешле җырчылар сәхнәгә игълан итмичә генә чыктылар. 

 

Икенчедән, сәхнәдә алып баручыларның бөтенләй булмавы гаҗәпләндерде. Күктән иңгән тылсымлы аваз сыман яңгыраган тавышларның "Болгар" радиосы алып баручылары Илфар Кәримов, Рөстәм Гайзуллин, Гөлназ Фәйзрахмановва, Илфак Хафизов, Айгөл Хәйруллина икәнлеген тамашачы барыбер танымый калмады. 

 

Өченчедән, "Болгар" радиосы алып баручылары тамаша залыннан берничә очраклы кешене сайлап бүләкләр дә тапшырды. Хатынының әнисен алып килгән ир-егет киләсе концертка билетлар, ә концертка берүзе килгән ханым "Вип кунак" исеме алып кайтып китте.

 

"Зинһар өчен, кермә төшләремә" ретро җырын һәм күңелле заманча җыр башкарып сөендергән Венера Ганиеваны тамашачылар дәррәү алкышлап җибәрми торды. "Мин бит блогер. Инстаграмда миңа лайклар куегыз, яме. Күптән түгел берәү "картайгансын инде, сәхнәгә чыкма", дип язса да, сезнең каршыга чыктым әле, бу кадәр матурлыкны өйдә ничек саклап ятасың!? Мин бик бәхетле!", диде.

 

Могҗизаның чираттагысы тәнәфестә көткән икән. Дәртле көйләргә урыннарында түзмичә биеп утырган тамашачы, беренче бүлектән соң чәйләп алуны да онытып, икенче мини-концертны тамаша кылырга йөгерде. Залда "Сорнай" фольклор ансамбле кунакларны тәнәфес буе биетте. 

 

Эстраданың яңалыклардан кайнап торуына, җырчылар барысын да инстаграмга чыгарып салуларына без күнегеп беттек инде. Шул нисбәттән Элвин Грей белән Гүзәл Уразованың дуслашуына пародия ясаган Алсу Фәракшина белән Айнур Сөләйманов "Красивая, хороший" җыры көенә "Замяли вопрос, Сөбханалла... Конфликт исчерпан, Машалла..." дип җырлап бирделәр.

 

Концертның иң күңелле урыны, мөгаен, Илсөя Бәдретдинованың тамашачылар белән бергә элекке җырлардан тезелгән попурри җырлавы булгандыр. Җырчыга күшылып рәхәтләнеп җырлап утырудан күңеле булган халык, ахырдан чыгарга тиешле Әнвәр Нургалиевнең килмәвен дә җиңел кичерде, ахрысы. 

 

Могҗизалы концертта могҗиза турында фикерләр күп яңгырады. "Могҗизаны һәркем үзе тудыра", "тормышта һәрнәрсәдән дә могҗиза күрә алыйк" дигән сүзләрнең бу авыр заманада яхшыга ышанычы беткәннәргә дә тәэсире булмый калмагандыр. Гадәттә, без могҗизаны Яңа ел алдыннан көтәргә күнеккән. Күңелләргә яз рухы кергәнгә күптән инде. Ә календарьда яз башлаганны бирле үч иткәндәй кар ява да, буран дулый. Кичә концерт алдыннан ява башлаган кар, концерттан чыкканда әле һаман ява иде. Инде җылы язның килүенә дә бар өмет могҗизага гына..