26.03.2019 Җәмгыять

«Эштән курыккан кеше авыруга әйләнә. Авырлыкларга бирешмәскә кирәк»

Надия апа Сәфәргалиева белән якыннан Әтнә базарында таныштык. Сөт, сыр, каймак сатып тора иде ул. Аның турында моңа кадәр дә ишетеп белә идек. Китапханәче дә булып эшләгән, авыл җирлеге рәисе булып та торган.

Сәфәргалиевләр районда каз үстерүче буларак та таныш. Туйлар, юбилейлар җитсә, беренче чиратта, аларга мөрәҗәгать итәләр. Мал-туар асрыйлар. Аларның сөт ризыкларына да ихтыяҗ зур. Без Надия апа белән аралашкан арада, сатарга әзерләп килгән ризыкларын алып та бетерделәр. Әле бер кочак заказлар да бирделәр.

«Ничек барысына да өлгерәсез?» – дигән соравыма Надия апа: «Бер тарыдан ботка булмый, шуны онытма, сеңлем. Үзем генә эшләмим бит, гаиләм – ирем Фәргать, өч балам: Кадрия, Айрат, Эллина да ярдәм итәләр. Бу безнең уртак эшебез», – диде.

Сәфәргалиевләр Әтнә районының Олы Мәңгәр авылында яши. 2001 елда ире Фәргать абый юл һәлакәтенә очраганнан соң, инвалидлар арбасына утырырга мәҗбүр булган. Ләкин көчле рухлы гаилә башлыгы кул кушырып утыра торганнардан түгел. Барысын да эшли: ашарына да пешерә, хатынына да булыша. каз өмәләрен дә Сәфәргалиевләр гаиләләре белән генә уздыралар. 150ләп казны үзләре генә эшкәртеп куялар.

Туйларга, бәйрәмнәргә казларны матурлап бизәп, пешереп саталар. Каз мамыгыннан мендәр сораучылар да күп икән. Быел беренче тапкыр казылык эшләп сата башлаганнар. Ни хикмәт, үзләре ат асрамыйлар. Казылык өчен итне күршеләре Фирдания апа белән Мөбарәк абыйдан алалар. Алар күпләп ат тота.

Надия апа эштән куркып тормый, таулар күчерердәй куәте бар диярсең, машинасын да йөртә, сыерын да сава, кирәк икән, каз да суя. Көр күңелле булуына да сокланырлык, ял итәргә дә өлгерә ул, күршеләре белән бергәләшеп төрле чаралар оештыралар, саф һавада пылау пешерү, самавырдан чәй эчү, гармуннар уйнап җырлашып утыру дисеңме... «Эштән курыккан кеше авыруга әйләнә. Авырлыкларга бирешмәскә кирәк», – ди Сәфәргалиевләр.

Надия Сәфәргалиевадан сыр ясау рецепты

Сыр өчен 1 кг эремчек, 1 литр сөт, 2 йомырка, 1 чәй кашыгы сода, 1 чәй кашыгы тоз, 100 грамм сыер мае кирәк булачак. Сөткә эремчекне кушып кайнатып чыгарабыз һәм сөзәбез. Сөзелгән эремчеккә рецепттагы калган ингредиентларны салып, әзер булганчы пешерәбез. Аннары шул катнашманы формага салып, салкын урынга куябыз.

Әтнә, Олы Мәңгәр

Эльвира МОЗАФФАР
Шәһри Казан
№ --- | 23.03.2019