"Күршебез, хастаханәдә ятса да, бөтенесен күзәтеп торды”

Балалары күптән үсеп җитеп, Казан, Чаллы, Әлмәт  якларына таралышкан. Һәр­берсенең – үз тормышы. Шуңа күрә газиз әнкәй, әт­кәйләре янына еш кайта алмыйлар. Аларны сагыналар, нишләп яталар икән, исән-саулармы дип борчылалар. Казанда яшәүче уллары Замир сагыну хисен бераз гына булса да җи­ңе­ләйтү чарасын тапкан. Туган йортына видеокамералар куйдырткан. Хәзер алар­ның үткән-сүт­кәнен дүрт камера күзәтә. Балаларга, оныкларга да эш табылган. Телефон аша  алар­ның  һәр адымын диярлек күзәтеп кенә торалар икән.

 

Уллары Замир  инженер булып эшли. Әти-әнисе янына ике-өч атна саен хәл белешергә кайта. ”Видео­күзәтү җайланмасын  хәзер күпләр  урнаштыра. Авыллар да читтә калмаска тырыша. Мин үзем шушы өлкәдә эшлим. Видеокамера куймасак,  читекченең читеге  булмаган кебек булыр иде.  Кайтып күрешеп килүгә җитмәсә дә, болай күңел тынычрак. Сеңел­ләрем телефон аша әти-әнинең һәр адымын күзәтеп тора”, – ди ул. 

 

Әлмәттә яшәүче Нурания апасы да: “Иртән торып, чәйнекне куям да тизрәк кулыма телефон алам. Бер­көнне әнинең туган көне иде. Аңа 79 яшь тулды.  Башта бер сәгать буе ишегалдына чыкканын күзәттем. Аннан, нигә мал-туар янына чыкмадыгыз, дип шалтыраттым. Туган көне белән котладым. Малларын иртә­рәк карап кергән булганнар, – ди.  – Соңгы тапкыр бәрәңге алышырга кайткан идек. Сагындык инде, менә хәл белергә кайтырга ният­ләп торабыз. Камералар уңайлы. Улыбыз да кызыкты әле. Сезне дә шулай кү­зәтеп торыр идек, ди. Өйдә ирем белән икәү генә яшибез. Авылда камера куйдырган кешеләр бар инде. Әнә күршебез, хастаханәдә ятса да, бөтенесен күзәтеп торды”.

 

– Башка эшләрне хәзер читкә куеп торабыз. Әти-әни фәлән сәгатьтә абзарга терлек карарга чыгарга тиеш, күрмичә калмагаек дип, тизрәк телефонга үреләбез. Ишегалдындагы аяк эзлә­ренә кадәр кадерле. Әнә урамнан күршеләр ат җигеп  үтеп бара. Вагыйз машинасында кайтып туктады. Мәчебез узып китсә дә, туган якка кайтып килгән кебек,  – ди Казанда яшәүче кызы Рәшидә. – Үз аякларында гына булсыннар, эш бетмәсен, дип телибез. Өч мәртәбә терлек карарга чыгалар. Кар еш яугач, әти көрәп кенә тора. Хәзер тимурчылар юк бит. Җәй көне бергәләп җиләккә йөриләр, печән әзерлиләр. Яшелчә, җиләк-җимеш утырталар. Әти  чишмә суын күрше авылга кадәр барып алып кайта. Чишмәнеке тәмле, ди. Урамда кемнәр йөрүен, ишегалдындагысын күреп торабыз. Аларны күргәч, җан­га рәхәт. Әйдәгез, чәйне бергәләп “эчәргә” аш-су бүлмәсенә дә куйыйк әле, дип шаяртабыз. Элегрәк булмады бу камера дигә­нең. Ихатадагы төсле металларны, хәтта өйдән акчага кадәр урлап чыктылар. Хәзер чит кеше керә алмый, капкага “домофон” куйдык. Әти-әниләргә, урамга чыккан саен,  камерага кул болгарга кушабыз. Алар безгә  сәлам юллый”.

 

Без шалтыратканда, әби-бабайның сөенечләре бар иде. Сарыклары бәрән­ләгән икән. “Балаларның, шалтыратып, сезне камерадан карап торабыз, диюен ишетү күңелле инде.  Әни кешегә тагын ни кирәк?  Әнә бабаң, нигә кирәк ул, дигән була. Без бит аның тәртибен аңлап бетермибез. Кем уйлаган шундый заман килер, камерадан гына күзәтеп ятарлар дип.  Ахырзамандыр инде бу!” – ди  Мәсгудә  әби.

 

Язма әзерләнеп беткән­дә генә әлеге гаилә, камералар куюга хокук саклаучылар каршы килергә мөмкин, дип, үз исемнәрен үзгәр­түебезне үтенде.  Казандагы юрист Рәшид Нәҗмет­динов әйтүенчә,  камералар кую – бик файдалы, яхшы әйбер. Әмма бу очракта әти-әни­ләр­нең ризалыгы кирәк. “Әлеге  йорт – аларныкы. Әти-әни рөхсәте бе­лән  видеокамераларны алырга да,  куярга да була.  Риза булмаган очракта, хокук бозу санала. РФ Гражданнар Ко­дексының 152.1 мад­дәсе буенча һәрбер физик зат үз сурәтенә үзе хуҗа. Аны каядыр кую өчен, алар­ның ризалыгы кирәк”, – ди ул. 

 

Моңа кадәр ничек элем­тәсез яшәгәннәр икән? Айлар буе – бер хәбәрсез. Рәх­мәт сиңа, интернет, заман тех­никасы! Син әле авыл белән шәһәрне, әти-әни бе­лән балаларны бәй­ләп то­расың. Аралашкач, ике як­ның күңеленә дә, исән-сау­лар икән, дигән җылы кереп китә. Әмма Замир  абый әйт­мешли, барыбер кайтып хәл белешүгә җитми инде. Җи­һаз кул җы­лы­сын алыштыра алмый. Әти-әни­ләр исән-сау булганда, ешрак кайтыйк, авыл­га сукмакларны суытмыйк.