Казанда «Ибраһим Аганинның өч гомере» китабын тәкъдим итү кичәсе була

15 февраль, җомга көнне бик үзенчәлекле, әһәмиятле вакыйга көтелә: «Ибраһим Аганинның өч гомере» дигән китап авторы - Николай Лузан белән очрашу булачак. Бу китап Мәскәүдә, «Кучково поле» нәшриятында рус телендә басылып чыккан иде.

Бер сулышта укылырдай мавыктыргыч китапны укучылар тиз арада яратып өлгерде. Гаҗәеп, һич көтелмәгән борылышларга бай сюжетны шәп разведчик Ибраһим Аганин һәм тормыш үзе яза.

Күптән түгел әлеге документаль повесть татар телендә, Фирая Бәдретдинова тәрҗемәсендә, Татарстан китап нәшриятында басылып чыкты. Кереш сүз - Татарстанның Беренче Президенты Минтимер Шәймиев авторлыгында. Китапта лейтенант Аганинның 1943-1944 еллардагы тормышы һәм хәрби хезмәте сурәтләнә. Басманың авторы - лаеклы ялдагы полковник, махсус хәрби хезмәт тарихчысы Николай Лузан. Ул 70 елдан артык яшерен сер булып сакланган архив материаллары арасында Аганинны күреп ала. Лейтенант Аганин бик шәп немец телен белә һәм күптөрле талантларга ия була. Аңа Сталинград чолганышыннан качып чыккан немец офицеры образында дошманның махсус хәрби хезмәте сафларына үтеп керү максат итеп куела. Зур сынаулар кичеп, ул алга куелган бурычны үти: бер ел һәм ике ай дәвамында Ибраһим Аганин партизаннар, яшерен хәрәттә катнашучылар гомерен саклап калырдай кыйммәтле мәгълүматлар таба. Фаш ителү куркынычы янаган мизгелдә бүтән немец офицерын юк итеп, аның исем-фамилиясе астында бүтән урында - Кырымда эшен дәвам итә.