18.01.2019 Язмыш

Миңнеханов баласына яңа гаилә эзләп Малаховка барган яман шеш белән авыручы хатын-кызга ярдәм итәргә йөкләмә бирде (ВИДЕО)

Хатын-кыз алты яшьлек улын тәрбиягә алачак ата-аналарны эзләгән, һәм аның тормыш хәле Татарстан Президентын битараф калдырмаган. Татарстаннан Андрей Малаховның «Туры эфир» телепрограммасы герое булган Айгөл Фазылова республика Президенты Рөстәм Миңнеханов кушуы буенча ярдәм алды. Бу хакта Хөкүмәт Йортында узган брифингта Казан Кремленең рәсми вәкиле Лилия Галимова сөйләде.

"Рөстәм Нургалиевич бу тормыш хәле турында хәбәрдар. Ул аны битараф калдыра алмады. Аның тарафыннан тиешле йөкләмәләр бирелде", - диде Галимова.

Татарстанның балалар омбудсмены Гүзәл Удачина бу гаиләдә булды һәм алты яшьлек Әмирнең яман шеш белән авыручы әнисе белән сөйләште, дип яза Татар-информ. Татарстан Республикасы Премьер-министры урынбасары Ләйлә Фазлеева да бу мәсьәләгә кушылды, дип билгеләп үтте Галимова.

"Агымдагы ел ахырына кадәр балалар бакчасы өчен түләү мәсьәләсе хәл ителгән инде. Әмир быел балалар бакчасын тәмамлый һәм аннан мәктәпкә бара. Әлеге хатын-кыз яши торган фатир бәясен компенсацияләү мәсьәләсе дә хәл ителгән", — диде Казан Кремле вәкиле.

Бу бик катлаулы һәм авыр хәлдә кирәкле барлык ярдәм, һичшиксез, күрсәтеләчәк, дип ышандырды Галимова.

Яман шеш авыруыннан интегүче Айгөл Фазылова улы Әмирне тәрбиягә алачак ата-аналарны табу өчен «Туры эфир» программасына килгән. Хатын-кызның үпкәдәге метастазлар белән сөт бизенең яман шеше дүртенче стадиядә. Фазыйлова инде дүрт ел чир белән көрәшә. Бәхетсез ана алты яшьлек улын балалар йортына алып китүләреннән курка.

Фото: Первый канал

---
Матбугат.ру
№ --- | 18.01.2019