Татар Моклокасында тантана

“Туган авылыбызны төзекләндерүдә һәм матур итүдә планнар күп, хыяллар зурдан. Әмма күп очракта теләкләр мөмкинлекләр белән тәңгәл килми шул. Авылыбызның нәкъ үзәгендә диярлек басып торган гасырлык тарихи агач түбәнлегендәге шушы шакшы урынны тазарту хыялы күңелемне күптән борчып торды.

 

Аллаһыга рәхмәт яусын, язмыш Наил Хәсәнович белән очраштырды һәм ул бу мәсьәләне чишүдә ярдәмен ышандырды. Без тиз арада кирәкле кәгазьләрне тупладык та, менә шушындый балалар мәйданчыгы ясыйбыз дип, проектны өлкә комиссиясенә юлладык. Ә ул югарыда хуплау тапкач, җиң сызганып эшкә керештек: вагонлап чүп-чар чыгардык һәм шул кадәр үк ком ташыдык. Аллага мең шөкер, морадыбызга ирештек һәм шул уңайдан Наил Хәсәновичның әти-әнисенә, район хакимиятенә олы рәхмәтләремне белдерәм”, - дип сөйләде Салех Сафинович һәм бу эштә төп спонсор булган Наил Билялетдиновны Хөрмәт грамотасы белән бүләкләде.

 

 

Спас район администрациясе башлыгы Татьяна Бирюкова да, җирле мәктәп директоры Сергей Бунегин да балаларга заманча ял урыны булдырырга нык булышкан Наил Хәсәновичны Рәхмәт хатлары белән бүләкләделәр, аның исеменә күп җылы сүзләр әйттеләр. “Шундый мәрхәмәтле кешеләр безнең арада күбрәк булсын иде. Наил Хәсәнович ярдәме белән төзелгән әлеге балалар мәйданчыгы киләчәк буында туган якка мәхәббәт тәрбияләүдә зур роль уйнаячак, кече ватанга хөрмәт уятачак”, - диде Татьяна Валентиновна.

 

 

Ә Сергей Викторович Салех Сафиновичны үзенчәлекле рәссам дип атады. Аның фикере буенча, җирле администрация башлыгы бар рәссамнарга хас булган пумала белән түгел, ә бүгенгедәй конкрет эшләре белән авылга өстәмә ямь биргән һәм файдалы булган мөһим гамәлләрен тормышка ашырып, туган авылы турында тарихка кереп калырлык үз рәсемен ясый. Чынлап та, район администрациясе башлыгы урынбасары Салех Кинзябаев әйтүенчә, “Җирле инициативаларга булышлык» программасы эшли башлаган елдан алып, Татар Моклокасы администрациясе бу проектның даими катнашучысы. Ә районның мәдәният бүлеге мөдире Елена Синева моклокалыларны, аеруча балаларны яңа мәйданчыкка сак карашлы булырга өндәде.

 

 

Әти-әниләр исеменнән күп балалы аналар – Гализә Кукаева белән Рәйсә Хабибуллина чыгыш ясадылар. Шуннан соң символик кызыл тасманы бәйрәмнең төп сәбәпчесе Наил әфәнде белән икенче класс укучысы Диләрә Салимҗанова кистеләр һәм, буа өзелгәндәй, халык агымы “Ручеёк” исемле ял паркына ашкынды, күз ачып йомганчы бар булган җиһазлар хәрәкәткә килде, парк бала-чага белән тулды. Бу көнне алар аеруча шат иделәр. Шуның өстенә спонсор нәни авылдашларына татлы күчтәнәчләр дә өләште, көзге күктәге кояш та җәйге сыман җылы нурлары белән сөендерде, моклокалыларның куанычларын күреп, елмаеп тора төсле иде.

 

И.Садеков фотолары.