13.11.2018 Мәдәният

Кариевлылар театр ничек барлыкка килүен карарга чакыра

Яңа татар театры ничек барлыкка килүен күрәсегез киләме? Алайса сезне 19 ноябрьдә нәниләр өчен спектакльләр һәм шигъри биюне карарга Габдулла Кариев исемендәге Казан Татар дәүләт яшь тамашачы театрына чакырабыз – театрда «Tat Cult Lab / театр» проекты эскизлары күрсәтеләчәк. Әлеге чара «Калеб» яңа буын җыены кысаларында үтә.

Эскизлар октябрьдә «Мәскәү» мәдәният үзәгендә тәкъдим ителгән иде. Габдулла Кариев театры җитәкчелеге, алга таба аларны театр репертуарына кертү максатында, Алмаз Садриевның «Киләчәк теле», Ксения Шачневаның «Зөһрә» спектакльләрен һәм Нурбәк Батулланың Кариев театры артистлары белән әзерләгән «Таң вакыты» заманча биюен сайлап алды.

Ксения Шачневаның «Зөһрә» спектакле декабрь ае репертуарына инде кертелде. Аны 1, 9 декабрьдә театрның кече залында 12.00, 14.00 сәгатьтә күрергә мөмкин булачак.

Программа:

«Киләчәк теле». Режиссер: Алмаз Садриев

Юнәлеш: бәби-театр

Эскиз балаларның ни рәвешле туган телләрен өйрәнүләре турында сөйли. Авторлар, «тел – традицион мәдәният – көнкүреш» чылбыры белән генә канәгатьләнмичә, милли телгә заманча образ булдырырга омтылыш ясый. (1+)

Башлана: 17.00

«Зөһрә». Режиссер: Ксения Шачнева

Юнәлеш: курчак театры

Балалар өчен билингваль тамаша әзерләнде — текст татарча яңгыраячак, шул ук вакытта һәркемгә дә аңлашыла торган визуаль образлар кулланылачак. Шул рәвешле рус телле балалар татар телен уен формасында өйрәнергә җәлеп ителәчәк. (5+)

Башлана: 18.00

«Таң вакыты». Режиссер: Нүрбәк Батулла

Юнәлеш: заманча бию

Нүрбәк Батулла сайлаган Сәгыйть Рәмиевнең «Таң вакыты» шигырендә бүген дә актуальлеген җуймаган сораулар күтәрелә. Ни сәбәпле без йокылы халәттәбез, кайчан уянырбыз, нигә Шагыйрьдән башка милләтнең торгынлыгын, белемсезлеген беркем дә күрми? Чыгу юлы нинди? Кариев театры актерлары сәхнәдә шуны күрсәтәчәк.

Башлана: 18.30

Керү ирекле

Аккредитацияне 18 ноябрьгә кадәр үтүегезне сорыйбыз.

---
Кариев театры
№ --- | 13.11.2018