Лилия Муллагалиева: «Күңелем кителгән чаклар да була»

– Әлеге китап кечкенәдән үк хыялланып, күңелдә йөрткән хезмәт түгел. 50дән артык җырым җыелды да, аларны халык күңелендә калдырасым килү уе туды. Башка төбәкләргә баргач, Лилия Муллагалиева репертуарыннан дип, бөтенләй башка авторларны әйтеп җырлыйлар. Үземнең җырларым миңа бик кадерле. Шуңа күрә күңелем кителгән чаклар да була иде. Аннан соң әлеге китапта 17 автор белән иҗат ителгән җырлар ноталары белән бергә тупланылды, – диде ул, китап чыгару идеясе турында әйтеп.

 

Лилия башкаруындагы «Без бит авыл кызлары», «Бәби көтәбез әле», «Бәхетле бул, балам», «Әниләр бәхете» һәм башка җырлар авторы шагыйрә Эльвира Сафина:

 

– Сер түгел, җырчыларның иҗатларына багышланган китаплар чыга тора, ләкин авторлар игътибардан читтә кала иде. Бу яктан да Лилия Муллагалиева күпләргә үрнәк дип әйтер идем. Җырларыбызны ноталар белән урнаштырып, үзебез турында мәгълүмат биргәне өчен, аңа барыбыз исеменнән дә рәхмәт. Аннан соң, китап искиткеч матур, затлы булып чыккан. Лилия үзе дә, чынлап торып горурланып, «Мин» дип әйтерлек кеше, – диде.

 

Лилия әйтүенчә, бу китапка кергән җырларның 42се сольный концертында җырланачак. Шунысы кызыклы, җырчының әлеге китаплары сатылмаячак. Ул аларны, «тамашачыларыма бүләк» дип язып, таратырга уйлый. Ә 850сен 29 сентябрьдә «Пирамида»да узган концертында тамашачысына бүләк итеп таратты.

 

– Кайвакыт кызганыч хәлләр була. Китапларны бүләк итеп бирәбез дә, аннан соң, залда сатканнарын күреп, күңел кителә. Минем тарафымнан бүләк ителгән икән, ул – чын мәгънәсендә, бүләк. Мин җырларымны бер генә җырчыга да сатып биргәнем юк. Аларны, бик сөенеп, җырларга теләгән җырчыларга тапшырыр идем, – ди җырчы.

 

Китап 1500 данәдә чыккан. Әгәр китапны сораучылар күп булып ихтыяҗ туса, кабат бастыру мөмкинлеген дә караячагын әйтте Лилия.

 

– Җырның язмышы авторлардан башлана. Җыр тудыру ул – бала тудырган кебек. Шушы иҗат әсәрләре буыннан-буынга күчсен һәм ул тамашачыларга дөрес итеп барып җитсен өчен, мондый китаплар бик кирәк. Бу хезмәтнең чит төбәкләрдә яшәүче татарлар өчен дә әһәмияте зур. Шуңа күрә әлеге китапның гомере озын булыр дип уйлыйм. Лилия өч бала (ә тиздән дүртенче баласы да булачак) анасы гына түгел, 50 бала анасы да, – диде Лилиянең якын дусты җырчы Айгөл Бариева.

 

Эльвира Сафина фикеренчә, җырчылар, җырлар сайлаганда, бик игътибарлы булырга тиеш.

– Бүген бөтен кеше яза. Кемдер – җыр сүзләрен, кемдер көй яза. Бу очракта җырчылар үзләре таләпчән булсын иде. Җыр сүзләрендә рифма, ритм тәңгәл килергә, мәгънә сакланырга тиеш. Һәр кеше үз-үзенә таләпчән булсын иде. Шул очракта сыйфатлы җырлар туар иде, – диде Эльвира Сафина.