КЕМ ГАЕПЛЕ?

Кичә төнлә метродагы шартлауда яраланган тагын бер кеше җан бирде. Нәтиҗәдә дүшәмбе көнге куркыныч фаҗигадә һәлак булучылар саны 39га җитте. Шулардан 33енең кем булуы ачыкланган. Хокук саклаучылар шикле кешеләрнең эзенә төшәргә маташа. Сәясәтчеләр исә террорчылар өчен үлем җәзасы кертергә тәкъдим итә.

Дүшәмбе көнне Мәскәү метросының ике станциясендә шартлауны кем оештырган? Рәсми затлар беренче көнне әлеге җинаятьчеләрнең эзен Төньяк Кавказдан эзләргә кирәклеген әйтте. Ингушетиядә, мәсәлән, үтерелгән боевикларның туганнарын тикшерә башлаганнар инде. Ә менә Чечня парламенты җитәкчесе Дукуваха Абдрахманов фикеренчә, шартлауда Мәскәүдәге махсус хезмәтләрнең дә гаебе бар. “Җитәкчелек каршында җавап тотканда, югары затлар гаепле итеп Төньяк Кавказ төбәкләрен телгә ала, – дигән ул. – Алайса, без Мәскәүдәге махсус хезмәтләр, хокук саклаучылар да гаепле дип әйтә алабыз. Стратегик корылма буларак сакланучы метрополитенда барлык иминлек чаралары күрелергә тиеш иде. Әгәр анда нәрсә дә булса алып керәләр икән, димәк, тиешле хезмәтләр уяулык күрсәтмәгән, йә бу эшне метрополитен яки хокук саклау органнары хезмәткәрләре ярдәмендә башкарганнар”. Абдрахманов әйтүенчә, террорчыларның миллә­те турында бәхәсләшкәнче, аларны табарга һәм хөкем итәргә кирәк.

“Террорчыларны юкка чыгардык, алга таба да юкка чыгарачакбыз, – дигән кичә Россия Президенты Дмитрий Медведев. – Соңгы елларда бу эшне башкарырга өйрәндек”. “Хәзер террорчылар өннәренә качышты, әмма аларны канализация төбеннән казып алырга туры киләчәк, – дигән ил Хөкүмәте башлыгы Владимир Путин. – Гаепле кешеләрне табу хокук саклаучыларның намус эшенә әверелде. Без моны эшләячәкбез”. Федерация Советындагылар исә илнең Җинаятьләр кодексына үзгәрешләр кертеп, күп кешенең үлеменә китергән террорчылык һөҗүмен оештыручыларга үлем җәзасы бирергә тәкъдим итә.

Шартлаудан соң беренче көнне үк хокук саклаучыларның өч кешедән шикләнүе, хәтта аларның фамилияләре дә билгеле булуы турында хәбәрләр таралды. Кайбер мәгълүмат чаралары исә милиция кулында шикле кешеләрнең фотолары булуы хакында белдерде. Хокук саклаучылар бу мәгълүматларны кире какса, журналистлар шикле кешеләрнең биографиясенә кадәр хәбәр итә. Әйтүләренә караганда, шартлатучылар Россия башкаласына гадәти автобуста чүпрәк-чапрак сатып алучылар белән бергә килгән. Террорчыларны автобус шоферы да таныган икән. Ике көн дәвамында Мәскәүнең төрле урыннарында бомба куелуы турында хәбәрләр килә. Соңгы мәгълүмат исә Мәскәүдәге төп православ гыйбадәтханәсе – Христос Спаситель чиркәвенә шартлаткыч урнаштырылу белән бәйле иде.

Ә Чиләбе өлкәсендә кичә Бәшир Плиевны эләктергәннәр. Башкорт әмире кушаматын йөртүче Ингушетия кешесен Башкортстанда банда оештыруда гаеплиләр. 27 мартта исә Башкортстанның Октябрьск каласында махсус хезмәтләр шикле кешеләрне кулга алу максатыннан операция уздырган. Әлеге чарада йөзләгән хокук сакчысы катнашкан, алар махсус техника, хәтта вертолетлар кулланган. Операция барышында сигез кешене эләктергәннәр, Плиев белән бергә качкан Владимир Тураевны исә әле дә эзлиләр.