"Күз тимәдеме икән Флерага дип тә уйлыйм"

Иҗатташлары Флера ханым­ның  затлылыгына, ихласлыгына басым ясады. Шагыйрә Шәмсия  Җиһан­гирова, энҗе кебек ялтырап яшәде, дип искә алды:

 

– Иҗатын тәртипле алып барды. Эзлекле рәвештә бик күп эшләде ул. Иҗат кешесе бит ул барысын да йөрәге аша үткәрә. Авыру йөрәгенә ул да зыянын салгандыр. Шуңа карамастан, бөтен чараларга  йөрде, укучылар белән очрашуларга ерак юлларга да чыга иде. Тормышта да иҗатта да эчкерсез дуслар булдык. Төпле нәсел кызы буларак, затлылык  белән аерылып торды. Ниндидер чараларга килеп кер­сә, зал, ялт итеп, игътибарын сәх­нәдән Тархановага күчерә иде. Энҗе кебек ялтырап яшәде ул.

 

Татарстанның халык шагыйре Роберт Миңнуллин шагыйрәнең арабыздан китүен зур югалту дип бәяләде:

 

– Шигъриятебезгә зур югалту бу. Без аның белән бер чорда укыдык. Татар бүлегенең иң чибәр кызы иде ул. Бик актив, чибәр, биюче. Шигърияткә соң­лабрак, ләкин бик әзерлекле килде. Җыр өлкәсендә, лирика өлкәсендә матур эшләр башкарып китте. Галимә иде. Аның китүе безнең өчен бер дә матур булмады. Ә үзе татар шагыйрә­ләре арасында иң матуры иде. Күз тимәдеме икән Флерага дип тә уйлыйм кайчак. Урыны җәннәттә булсын.

 

Язучы, Тукай премиясе лауреаты Мәдинә Маликова да затлылыгына, матур киенеп йөрүенә сокланды. Аны Язучылар берле­генең би­зәге дип атады:

 

– Борынгыча зыялы итеп киенүен, ихлас булуын яраттым. Эшләгән эшлә­ре дә берәгәйле булды. Чистай районында Гаяз Исхакый укуларын оештыруы гына  да  – милләт өчен зур эш.

 

Арча педагогия көллияте укытучылары яраткан укучыларын югалтуны бик авыр кабул итте. Уку йортының ышанычлы дусты, ярдәмчесе булды дип искә алдылар. Укытучысы Илдус Сәгъдиев Флера Тарханова турында менә ниләр сөйләде:

 

– Флера Арча педагогия училищесын 1966 елны тәмамлады. Бик әйбәт укыды ул. Мин аларны математикадан укыттым, иң сөйкемле, акыллы, тырыш укучым итеп истә калдырдым. Аннан шунысы да бар: Флера Арча училищесын 50 ел элек тәмамлады һәм шушы дәвердән бирле укытучылары белән дә, уку йорты белән дә элемтәне өзмәде. Укытучыларын яратып, олылап, һәр­бер­сен туган көннәре, бәй­рәмнәр белән котламыйча калмый иде. Китабы чыкса исә, иң беренче итеп көллият китапханәсенә юллый иде. Арча көллиятенә багышлап, бик матур шигырьләр язды. Бүген менә шуларны кабатлап утырам... Бик авыр хәбәр... Кү­ңелем белән акыллы, ярдәмчел укучымны югалтуга ышанып та җитмим әле. Татарстан Министрлар Кабинетында эшләгән чагында аңа гозер белән барырга туры килде. Көллият исеменнән ярдәм сорагач, ул вакытта Премьер-министр булып эшләгән Рөстәм Миңнехановка алып кергән, уку йортына студентларны йөртү өчен автобус алып бирергә булышкан кеше бит ул. Бу искә алуым рухына дога булып барсын, урыны оҗмах түрләрендә булсын иде.