ЗӨЛФӘТ ХӘКИМ КОНЦЕРТЫН КҮРГӘН КЕШЕ ЯЗМАСЫ

Яратам да шул озын чәчле гитаралы егетләрне... Тимурның соло-гитарасы тавышы әле дә колагымда яңгырап тора, күңелнең төпкелендә яшеренгән җепселләрне тарттырыпмы тарттыра. Зөлфәт Хәким соңгы ике җырын башкарганда гитараның ике кылы көчәнешкә чыдый алмады ахрысы, өзелде.. Шулай да Тимур кылны тиз генә тарттырып куйды, бернинди уңайсызлык килеп чыкмады дип уйлыйм, һәрхәлдә тамашачыларның бик игътибарлысы гына кылның өзелгәнен сизгәндер.

Илдарның бас-гитарасы тавышы гел югарыга таба очыра. Сәхнәнең түрендә иң биектә утыручы клавишниклар Марат белән Юрий әйтерсең лә йолдызлы яңгыр койдылар, алар аерым-аерым да, бергәләшеп шәп эшлиләр. Барабаннар артында утыручы Тимур музыкага үзенчәлекле хисләр, тизлек өсти.

Зөлфәт Хәким халык күңелен яулаган җырларының инде күбесен язганнан соң, Барс-Медиа компанияләр группасының әле 2006 елда гына оешкан инструменталь ансамбле яртакан җырчыбызга лаеклы аккомпонимент булды, минемчә. Зөлфәтнең моңлы фәлсәфәсенә җанлы музыка өрде. Шәхсән мин, Зөлфәтне утырып түгел, ә аяк өсте тыңлар идем. “Дөньяның яратылуы” фестивалендә Макаревич, Шевчук чыгышларын тыңлаган кебек.

Җырчы-музыкантлык таланты белән, һич арттырусыз, Scorpions, Gorky Park, Пол Маккартни, Борис Гребенщиков һәм шуларның ишләре белән бертигез дәрәҗәдә торган, әсәрләре белән татарның горурланырлык улы булган Зөлфәт Хәким сәхнәдә үзен бик тыйнак тотты. Ул оялып кына, шул ук вакытта нык адымнар белән сәхнәгә килеп чыкты. Зөлфәтнең сәхнәдә күренүе белән зал алкышларга күмелде, җырчысын көткән тамашачы озак кына алкышлардан айный алмый торды. Гел кул чабып утырдык без. Тамашачылар җырларның сүзләрен беләләр, башкарылачак җыр исемен әйткәч тә,  алкышлар, җыр тәмамлангач та – алкышлар. Һәр җырын беренче һәм соңгысы итеп кабул итеп, чын күңелдән хисәләнеп,  дулкыланып тыңладылар, минемчә.

Узган көздәге концертындагы киемнәрен бераз гына үзгәрткән Зөлфәт, бу юлы ул концертны “Lacoste” фирмасының куе кызыл төсле футболкасын киеп тәмалады. Инде Зөлфәт Хәким дә бу фирма киемнәрен кулай күргәч, залдагы тамашачыларның күбесе крокодиллы өс кименәрен кияргә теләр, минемчә. Ә шаяртусыз әйткәндә, Зөлфәт Хәкимгә классик костюм бик тә килешә, фирменный футболка киеп чыкмаса да, без аны бик яратабыз.

Залда күпчелек урта яшьләрдә, балачагы, яшьлеге совет чорына туры килгән кешеләр иде булса кирәк. “Саф” фикер, “яңа” дөнья өмет иткән, ирек, демократия һәм комсомолны берләштерергә омтылган чорда килеп чыккан озын чәчле, сакал-мыеклы, беркемгә дә ошамаган, үзенчәлекле һәм бердәнбер Зөлфәтнең милли дә, ирекле дә фәлсәфәсе  аларны барысын да магнит кебек үзенә тарткан диярсең... Зөлфәт Хәким иҗатын яратучылар белән Камал театры залы шыгырым тулы: утырып кына түгел, аяк өсте карарга да тамашачылар күп җыелган иде. Партерда утыручы “Татарстан - Яңа гасыр” генераль директоры Илшат Әминовның кура җиләге төсендәге галстугы әллә кайдан ук “Бәйрәм бүген!” дип кычкырып торган кебек булды миңа. ГТРК директоры Айрат Сибагатуллин да бар иде. Театр сәхнәсендә уйнаучы артистлар бу кичтә залга төшеп утырганнар - тамашачылар арасында камаллылар да бик күп күренде. Театрның директоры Шамил Закировны Зөлфәт Хәким сәхнәдән туган көне белән котлады. Концерт башлангачы да, тәнәфес вакытында Шамил әфәнде залда булды, ул шәхсән үзе тамашачыларны каршы алырга чыккан иде бугай. Балконда хәләл җефете белән язучы Камил Кәримов тә рәхәтләнеп тамаша кылып утырды.

Концерттан соң өйләренә таралырга ашыкмаган тамашачыларның йөзендә кәнәгатьлек хисе балкып, сөйләмнәрендә бары “шәп”, “әфәрин”, “күптән болай ял иткән юк иде” сүзләре фойены гөжләтеп бераз торды да, халык кәефләнеп кенә урамга агылды...