12.03.2018 Мәдәният

“Язгы Солянка” килә, тәрәзәне ачыгыз

Инде мартның уртасы җитсә дә, көннәр кояшлы торса да, җылытырга ашыкмый әле. Ә күңел бит инде җылылык, наз, тизрәк яз җитүен тели. Яз кайчан башлана дисезме?

Быел яз 17 мартта килә! УНИКС концертлар залында узачак "Язгы солянка" көтелгән ел фасылын иң матур җырлар белән каршы алачак!

Бәйрәмнәр бетте, 8 мартлар да үтте дип, өегездә утырмагыз, туганнарыгызны, дусларыгызны алыгыз да бәйрәм концертына килегез. Гади генә 17 март көнен дә җыр-биюләр, иң яхшы алып баручылар белән бәйрәм көненә әйләндереп була бит. Бу кичтә УНИКС сәхнәсендә татар эстрадасының танылган җырчылары бер сәхнәгә җыелачак: Чәчкә, Айгөл Рәхимова, Резедә Шәрәфиева, Бәширә Насыйрова, Иркә, Азат Тимершәех, Римма Ибраһимова, Алсу Әбелханова, Рамил Галимҗанов, Илсаф, Вадим Захаров, Рафаэль һәм Динә Латыйповлар, Ильмира Нәгыймова. Әлеге концертта инде тиздән 3 нче тапкыр әни булачак Ләйсән Гыймаеваның да чыгыш ясавын күрерсез, шулай ук махсус “Язгы солянка”да катнашырга дип Эльмира Сөләйманова, Ландыш Нигъмәтҗанова да үзләренең гастроль турларыннан кайтып җитәчәк. Чакырылган кунаклар арасында - Башкортстанның һәм Татарстанның халык артисты Идрис Газиев та булачак.

Популяр җырчылар башкаруындагы хитларның һәрберсе күңелләрнең иң нечкә кылларын тибрәтер. Салкын караңгы көннәрне бергә җырлый-җырлый озатыйк!

Хисләр ташкыны, күңел күтәренкелеге, яңа сулыш, яңа өметләр - язның бөтен сихри көчен тоясыгыз килсә, "Язгы солянка"га килегез! Язны җырлап чакырып китерик!

---
Барс-Медиа
№ --- | 12.03.2018