Авариядән соң ул берни дә хәтерләми, аң­ламый, сөйләшә дә алмый

Казанда яшәүче Рәшит әфәнде гаиләсе әлеге кешеләр өчен бик күп кием-салым бирде. Сания исемле укучыбыз да күчтәнәч­лә­рен әзерләп куйган. Ә Гөлфия ханым ике капчык кием, ике тартма күчтәнәч белән улларын җибәргән.

 

Гөлзәйнәп Шәри­пова гаиләсе бе­лән Кукмара районында яши. Күч­тәнәч­ләрне алар­га үзебез алып кайтып би­рергә ниятлибез. Гөл­зәй­­нәп ханым үзләренең авыр хәл­дә яшәүләреннән уңайсызлана. Шуңа да элемтә өчен үзебезнең телефон номерын куйдык.

 

“Дөресен әйтәм, хатыма җавап булмас, дигән идем. Хәзер бит һәр кешенең үз кайгысы, үз тормышы, үз мәшәкате. Күпләр кредит түли, минем кебекләргә ярдәм итмәс­ләр, дигән идем. Сезнең хәбәре­гезне ишеткәч, күңелгә рәхәт булып китте. Ул кешеләргә Алланың рәхмәте яусын!”– диде Гөлзәйнәп.

 

“ВТ” һәрвакыт кешеләр язмышына битараф калмыйча, аларга ярдәм оештырырга тырыша. Кем­гәдер киемләтә, ризыклата, уку кирәк-ярагы белән булышсак, дусларыбыз ярдәме белән хәйрия концертлары да оештырабыз. Чираттагысы 28 март көнне Казандагы “Юность” мәдәният йортында узачак. Ниятебез – юл фаҗигасенә юлыгып инвалид калган 25 яшьлек Ленар Галимуллинга ярдәм итү.

 

Ленар эштән кайтканда, ава­риягә очрый. Бик күп операция­ләр кичерә. Табиблар өметләндермәсә дә, әнисе һәм әбисе ярдәме белән ул бераз тернәкләнә. Тик берни дә хәтерләми, бер кешене дә аң­ламый. Сөйләшә дә алмый. Улы бәлагә юлыккач, әтиләре йөрәк авыруыннан үлеп китә. Тормыш­ның бар авырлыгы әнисе Роза ханым җилкәсенә калган. Ленарның сыйныфташлары, дуслары аның терелүенә ышаналар. Һәрчак хә­лен белеп, булдыра алганча ярдәм итәләр. Бу чараны оештыруны да алар сорады. Сез дә әлеге концертка килеп, Ленарга ярдәм итә аласыз.