ТИНЧУРИН ТЕАТРЫ КЫЗЫК-МЫЗЫКЛАРЫ

Театрда ике Әнәс абый эшли. Берсе Татарстанның халык артисты, профком рәисе Әнәс Галиуллин, икенчесе эшче монтер. Шулай бервакыт эш килеп чыкты да, тиз генә Әнәс абыйның телефон номерын җыйдым.

– Әнәс абый, сез кайда?

– Мин өйгә кайтып бара идем... Нәрсә булды?

– Өстәлләр күчерергә кирәк иде!

– И–и, Аллам, нинди өстәлләр инде ул тагын?

– Безнең бүлмәдәге өстәл-урындыкларны складка төшерәсе бар! 15 минуттан килеп җитегез!

Бераз вакыттан соң җитәкчеләрнең берсе шалтырата:

– Син нишләп профкомга өстәл күчерергә кушасың?

– ??? Мин… монтерга шалтыраткан идем бит…

– Монтерга шалтыраткансың да – профкомга эләккәнсең шул.

* * *

Татарстанның халык, Россиянең атказанган артисты Исламия Мәхмүтовага ахирәте Минзәлә театрыннан Татарстанның халык артисты Венера Нигъмәтуллина кунакка килә. Исламия ханым һәм Хәлил абый репетициягә китәләр, кунак өйдә үзе генә кала. Телефон шалтырый:

– Исламия апа, исәнмесез! Бу...

–  Исламия апаң түгел әле...

– Ә-ә, Ләйсән сәлам!

– Ләйсән түгел...

– Гафу, Лилия, Хәлил абыйны чакыр әле!

– Лилия дә түгел...

– Ой... кем соң бу? Кая эләктем мин?

– Бу Венера апаң әле, Минзәлә театры артисткасы.

– Минзәләгә эләктеммени?...

– Хуш!

* * *

Наил Шәйхинең тормыш иптәше Миңлегөл ханым премьера спектакленең яңа буклет-программкасын укып чыккач иренең “Татарстанның халык артисты” исеме генә язылганлыгына игътибар итә, ә “РСФСРның атказанган артисты” дигәне төшеп калган.

– Нигә минем иремнең исемнәрен берсен генә яздың? Алар бит икәү! – ди ул буклетны эшләгән дизайнерга.

– Ә мин Сезнең ирләрегезнең исемнәрен каян белим? Наил абыйны яздым, икенче ирегез турында миңа беркем-бернәрсә әйтмәде...