Өлкәннәр көне хәтерне калдырды

Мәдәният йортлары өлкәннәр өчен күңел ачу чаралары оештыра. Ветераннар советы, шәһәр башкарма комитеты социаль яклау бүлекләре концертлар, чәй табыннары, мунчага бушлай керү, чәчтарашханәгә бару мөмкинлекләре булдыра.

 

Химиклар мәдәният йортында «Юность» клубы үзешчәннәре дә бик матур концерт программасы әзерләгән иде. Концерттан соң һәркем тәм-томнар белән сыйланды. Икенче көнне бәйрәм Татар дәүләт филармониясендә пенсионерларның «Балкыш» фес­тивале лауреатлары концерты белән дәвам итте.

 

Тик менә безнең өчен 1 октябрь көнне Декабристлар урамы, 100нче йорт ашханәсендә оештырылган бәйрәмнән соң хәтер калды. Үзебезне кимсетү дип кабул иттек без бу чараны. Ашханәгә 100 кеше чакырылган булса да, аның 53е генә килгән иде. Безгә ашханәгә кергән башка кешеләр, бала-чагалар белән бергә утырыр­га туры килде. Пенсионерлар өчен бер вакыт билгеләп, аларны аерым җыярга булмый идеме икән? Иртәдән үк әзерләп куйган ризыклары суынып беткән. Бәйрәмгә дип әзерләнеп, матур киенеп килгән өлкәннәребез өс киемнәреннән утырырга мәҗбүр булды. Салыр идең – гардероб юк. Ризыкка сүз тидерергә ярамаса да, әйтми түзә алмыйм: суда гына пешерелгән борщ, ите дә, каймагы да юк, салкын майсыз макарон, тавык итеннән резина кебек бер котлет, чи кәбестә салаты, каты камыр ризыклары һәм чәй. Бу – 100 сумлык меню, имеш. Моның урынына кайнар чәй белән йомшак бер тәм-том бирсәләр, күпкә отышлырак булыр иде, мөгаен.

 

Ә иң мөһиме: игътибар, уңай мөнәсәбәт, җылы караш җитмәде безгә. Салкын ашны кабуга, тамакка тыгылган төердән күңел әрнеде. Үземне бик кимсетелгән итеп хис иттем. Калганнар да ризыкка кагылмады. Өлкәннәр көнендә мондый тамашаны күрү оят иде. Югыйсә анда 40-50 ел гомерен төрле өлкәгә багышлаган табиблар, укытучылар, башка хөрмәтле һөнәр ияләре җыелган бит. Әнә «Ярдәм» мәчете урамдагы бомжларга да термос белән җылы ризык әзерләп бирә.

 

Бу чараның кушылганга кирәк өчен генә оештырылганлыгы күренеп тора иде.

 

Гаеплеләрне эзләргә җыенмыйм. Шулай да бу бәйрәмне оештыручылар, ашханә хезмәткәрләре үзләренең дә олыгаясыларын онытмасын иде.