"Ярдәм" мәчетендәге ифтарларга быел билет белән генә кертәләр дигән сүз дөреслеккә туры килми

Эш шунда ки: "Ярдәм" ислам хәйрия фонды быел "Рамазан чатыр"ларын ике урында оештырды. Узган елларда ифтарлар 1000 кешелек чатырда уза иде. Быел исә күбрәк кешегә авыз ачарга мөмкинлек тудырылган. Зур чатырда 1000 кеше сыя, Кече чатыр - 200 кешелек. Ике чатырда да өстәлләр бер төрле корыла, бер төрле ризыклар куела.

 

Зур чатырга авыз ачарга керү – ирекле. Ә Кече чатырга билет алып керергә кирәк икән. Әмма билет алып керү – түләүле дигән сүз түгел.

 

Билет кемнәргә бирелә соң? Кече чатырга билетлар системасы ураза тотучыларның түбәндәге категорияләрен исәпкә алып кертелгән:

 

- хәзерге вакытта "Ярдәм" дәвалау-укыту тернәкләндерү үзәгендә курсларда булган күрмәүчеләр һәм начар күрүчеләр;

 

- ишетмәүчеләр һәм начар ишетүчеләр ("Ярдәм" мәчете алар өчен җомга көннәрендә ишарәләр теле (сурдоперевод) белән вәгазьләр оештыра);

 

- Казанның Юдино бистәсендәге инвалидлар җәмгыяте әгъзалары ("Ярдәм" милли ислам хәйрия фонды аларга ярдәм күрсәтә);

 

- "Гаилә учагы" йортында яшәүче һәм тәрбияләнүче балалар ("Ярдәм" милли ислам хәйрия фонды аларга ярдәм күрсәтә);

 

- Левченко бистәсендәге мәхәллә пенсионерлары;

 

- ифтар уздыручы хәйрияченең туганнары һәм кунаклары.

 

"Рамазан чатыры" – ул уникаль мәдәни-хәйрия һәм мәгърифәтчелек проекты. Ел саен үз тирәсенә төрле милләт һәм төрле диндәге меңләгән кешене җыя. Зур чатырга мәҗлескә килгән һәркем кертелә. Беркемнән дә паспорты, кайсы диннән, миләттән булуы, ураза тоту-тотмавы соралмый. Ураза тоту исламда гына түгел, барча диннәрдә дә бар. "Сукбай булса да кире бормыйбыз. Атеист-дәһри булса да рәхим итсен. Кем белә, шушында вәгазь-нәсихәт тыңлап, бәлкем дин юлына керер, күңелендә рәхим-шәфкать, миһербанлык артыр," – диде "Ярдәм" мәчете имам-хатыйбы Илдар хәзрәт Баязитов.

 

Ифтарларда вәгазьләр укыла, гыйбрәтле хәлләр сөйләнә, күмәк дога кылына. Кече чатырда мәҗлесне имамнар Рафис хәзрәт Сәйфетдинов һәм Раил хәзрәт Әхмәтов, Зур чатырда - хәләл тамада Гамил Нур алып бара.

 

Ай дәвамында казанлыларны һәм Татарстан башкаласы кунакларын ифтар ашлары белән сыйлаучы иганәчеләр арасында дини лидерлар, сәясәтчеләр, эшкуарлар, мәдәният һәм фән эшлеклеләре, иҗтимагый оешмалар вәкилләре бар икән.

 

Шулай ук ай дәвамында мәчеттә сәхәрләр дә әзерләнә. Көн саен 150-200 кешегә өстәлләр корыла. Ишекләр һәркемгә ачык.

 

Рамазан аеның санаулы көннәре калып бара. "Ярдәм" мәчетенә ифтарларга рәхим итегез!