КИЧӘ КОРБАН ГАЕТЕ ИДЕ...

Шаулап-гөрләп быелгы Корбан гаете дә үтеп китте. Бәйрәм уңаеннан телевидение тапшырулары да күрсәтелде, газеталарда бик күп язмалар басылды. Барысы да бер рухта – имеш, халык исламга елдан-ел ныграк тартыла. Ә мин алай димәс идем. Динебез дә телебез кебек үк тернәкләнеп китә алмады, җәмәгать.

...Корбан гаетенең икенче көнендә астагы күршеләребез Флүрә белән Сергейның кычкырышкан, дөбер-дөбер сугышкан тавышларына уянып киттем. Бәйрәм-сәйрәмнәрдә шулай «төшерергә» яраталар алар. Шуннан керфекле күземә йокы кермәде инде. Карчыклар шикелле сукранып, үз-үзем белән сөйләшеп яттым. Үзең дин тотмасаң, бүтәннәрнең хисләрен аз гына булса да ихтирам итәргә кирәк ләбаса.

Күңелемә юаныч эзләп, шәһәр үзәгенә барып кайтырга уйладым. Китап кибетләренә дә керәсем бар иде. Урамга чыксам, подъезд төбендә үк үзебезнең йортта яшәүче япь-яшь татар кызларының тәмәке көйрәтеп торуларын күреп, кәеф тагын кырылды. Бәйрәм табыны артында «бисмилла» әйтеп пешерелгән ризыклар белән сыйланып кына утырыр урында, минәйтәм...

Шприц, презервативлар белән чуарланган ишегалды сукмагы буйлап тукталышка атладым. И Раббым, чалган корбаннарыбыз безнең бу гөнаһларыбызны юып бетерә аламы икән, Лут кавеме кебек, тау-таш белән бастырып куймасаң гына ярар иде инде Син безне.

Бауман урамында кеше аз иде. Кичәге бәйрәмнән шәһәр халкы әле айнып бетмәгән, күрәсең. Урамның бирге башындагы кечкенә генә бер китап кибетенә сугылдым. Мин эзләгән биология буенча БДИга әзерлек китабы 413 сум тора икән. Аннары подвалдагы татар китабы кибетенә төшеп, 30 сумга Нәҗибә Сафинаның «Кан хәтере», 25 сумга Марсель Галиевнең «Учымда тургай шәүләсе» дигән китапларын сатып алдым. Алдым да... гарьлегемнән күзләремә яшь бөялде. Ничек бу көнгә төштек соң без? Шундый шагыйрьләребезнең шигърияте бүген шалкан бәясенә сатыла! Нәрсә, биология – кирәкле фән, чөнки аның киләчәге бар, ә татарның шифалы теленең, сихәтле сүзенең юкмыни?! Бездә газиз телебезгә, динебезгә менә шундый мөнәсәбәт. Корбан гаете дә күп кардәшләребез өчен өстәмә ял көне, табын артына җыелышып эчеп утыру өчен бер форсат кына булды. Кич белән мунчада эшләүче апам шалтырата: «30 меңлек билет саттым. Татарлар махмырдан чыгу өчен мунчага йөри бит хәзер», – ди.

...Ә элекке көнне Корбан гаете иде.