ЧАНАНЫ ҖӘЙДӘН, АРБАНЫ КЫШТАН ӘЗЕРЛӘ... (ФОТО)

«Татагромаш-К» компаниясе җирдә эшләүчеләргә яхшы таныш. Ул нигездә Польшада (Pronar маркалы) җитештерелгән авыл хуҗалыгы машиналары һәм таккычлар белән тәэмин итүче эре берләшмә. Игътибарымны аеруча таккычлар җәлеп итте. Алар чыдам һәм күп функцияле булулары белән уңайлы. Мәсәлән, бер үк трактор печән вакытында эскерт өя алса, казу эшләре вакытында таккычын алыштырып чокыр казый башлый. Ә кирәк чакта яңа таккыч куеп җир дә тигезли. Дөрес, мондый техниканыңбәясе арзан түгел. Тик өч трактор тотканчы, бер трактор тотуың файдалырак: чыгымнары да азрак, урынга да эконом. Халык та бит, сигез сыер асраганчы, симез сыер асра дип белми әйтмәгән. Әлеге техниканың аерым берничә төргә җайлаштырылган булуы эшне сыйфатлырак итеп башкарырга булыша.

 

«Тандем» тибындагы прицеплар авыл хуҗалыгы культураларын (бодай, арыш, кукуруз), яшел массаны һәм кырга чыгарыласы ашламаны, әрәм-шәрәм итмиче, кирәкле урынга җиткерергә мөмкинчелек бирә.

 

Ә таккыч-платформалар прессланган салам һәм сенаж түкләрен ташуда бик уңайлы. Аларга биеклеге 3 рәтле рулоннарны да төяп була. Киң шиналы көпчәкләрдә юеш кырлар буйлап йөрергә дә мөмкин. Тизлеге 40 км/сәгатькә кадәр җитә торган бу таккыч-платформаларда ерак араларга да йөрергә була.

 

Техника ничек кенә заманча булмасын, анда кеше эшләячәк. «Элек механизаторлардан «колхоз малы» дигәнне ишетеп була иде, хәзер юк! – ди җирле җитәкчеләр, – Алар әлеге техниканың күпмегә алынганын белә, аңа үз өйләрендәге җиңел машинага караган кебек карый. Әлеге техникада ике, хәтта өч тапкыр күбрәк җитештерергә була. Монда эшләгән кешегә дә уңайлы. Кырдан кайтып, өстен алыштырмыйча кунакка, йә йөргән кызы белән очрашуга ук китәргә була».

 

Һәр өлкәдә үз эшенең осталары булган белгечләр кирәк. Авыл хуҗалыгы да искәрмә түгел. Моны җитәкчеләр яхшы аңлый. Шуңа күрә Авыл хуҗалыгы академиясеннән машина-трактор паркын эксплуатацияләү кафедрасы доценты, техник фәннәр кандидаты Семушкин Николай Иванович та семинарга чакырулы иде. Ул җитәкчеләр белән практикага студентларын китерде. Парта артында китап укып кына үз эшеңнең остасы булып булмый шул, практика кирәк. Мондый очрашу һәр як өчен дә файдалы.

 

«Татагромаш-К» директоры Ринат Хәмәдияров үзе дә тумышы белән шушы яктан. Шуңа да Балык Бистәсе районы якын аңа. Быел Ринат әфәнде үзе дә җир алып бәрәңге иккән. Уңышы яхшы булды, ди. Тик уңыш алу бер хәл, аны саклау – икенче проблема. Тик монда ул да хәл ителгән. Иске складларны җиһазлап, алынган уңышны шунда саклыйлар. Складка килеп кергәч, биек итеп өелгән агач әрҗәләргә күзем төште. Монда бары тик сайлап алынган бәрәңге генә саклана. Гади кагыйдә: арада бер генә череге дә булмаска тиеш, юкса бөтен әрҗә әрәм булачак! Склад буенча чит ил киноларында гына күрергә күнеккән бәләкәй «Nissan» машиналары җилдерә. Хәер, Ринат әфәнде җиргә табыш чыганагы итеп кенә караучылардан түгел. Авыл җире аның өчен милләт һәм тел сакчысы да. Авылдашлар кайсы гына төбәккә таралсалар да, туган нигезләрен онытырга тиеш түгел дип саный ул.