«Татфондбанк» мәсьәләсе: халык та, банклар да ял итми

«Күз карасыдай, тиенләп җыйган акчаларыбыз югала бит», – дип күпләр пошаманга төшсә, «Аллаһка шөкер, акчам юк – йокым тыныч»,  диючеләр дә байтак арабызда.

 

Айзат Газизҗанов Актаныш районында кошчылык белән шөгыльләнә. 2016 елның 15 декабрендә («Татфондбанк»ка Россия Банкы тарафыннан чикләүләр кертелгән көн) ул кош-кортларына азык алу өчен «Татфондбанк» аша 160 мең сум акча күчерә. Икенче көнне йөк машинасы яллап, Чаллыга бара. Шунда гына акчаның тиешле оешмага килеп җитмәве ачыклана. Аяз көнне яшен суккандай була яшь эшмәкәрне. «Ашамый торыгыз, банкка чикләүләр кертелгән», дигән сүзләр белән туендырып булмый бит 43 мең чебешне.

 

Гомумән, күпләр авыр хәлдә калды. Иминият акчалары биреләчәк, дип тынычландырсалар да, һәр нәрсәгә шикләнеп карарга өйрәнеп киләбез шул. Әмма иминият акчаларын алып, бераз күңелләренә җылылык керүчеләр көннән-көн арта бара. Бүгенге көнгә «Татфондбанк»ның 93 мең кертемчесе иминият акчасына ия булган. Барлыгы 34 млрд сум акча Татарстан халкына кайтарылган. Шулай итеп, 6 гыйнварга Россиянең кертемнәрне иминиятләштерү агентлыгы иминият җаваплылыгының гомуми суммасыннан 73,4 процентын түләгән.

 

Әлеге акчаларны кайтаруга җаваплы банк-агентлар бәйрәм көннәрендә дә халыкны кабул итә. Алар узган елның 26 декабрендә үк тулы куәткә эшли башлаган иде.

 

Таякның иң авыр башы эшмәкәрләргә төшкәндер. Аларга ярдәм итү өчен, Татарстан Президенты Рөстәм Миңнеханов йөкләмәсе буенча, республика Икътисад министрлыгы каршында эшче төркем булдырылды. Эшмәкәрләр сораулары буенча Татарстан Республикасы Икътисад министрлыгы белән туры элемтә дә үз эшен дәвам итә.

 

Татарстанда үз эшчәнлеген туктаткан банкларның (чикләүләр «Интехбанк»ка да кертелде) клиентлары – 921 эшмәкәр Татарстан Республикасы Икътисад министрлыгына «кайнар линия» буенча мөрәҗәгать иткән. Аларның 441е ташламалы шартларда микрозайм алу турында сораган. Бүгенге көнгә 127,3 миллион сум күләмендә микрозайм алу өчен 67 гариза бирелгән.

 

Ташламалы программа буенча микрозаймнар бирүгә гаризалар кабул итү офисы бәйрәм көннәрендә 7.00-23.00 сәгатьләрдә эшли. «Кайнар линия»дә шалтыратуларны 8.00-20.00 сәгатькә кадәр, шулай ук эшмәкәрләрнең мөрәҗәгатьләрен (843) 524-90-90 номеры буенча да кабул итәләр.

 

 

Микрозайм 3 елга бирелә. Эшмәкәргә беренче 12 айда төп бурыч буенча түләүне кичектереп тору мөмкинлеге каралган. Ул микрозаймны эшчеләренә хезмәт хакы, налог һәм башка мәҗбүри түләүләр кебек үз эшчәнлеген алып баруда куллана ала. Микрозайм махсус программа буенча еллык 5 процент белән бирелә.

 

«Стабильность» махсус программасы буенча микрозайм алу өчен кирәкле документлар исемлеге Татарстан Республикасы Икътисад министрлыгы (mert.tatarstan.ru)  һәм «Татанстан Республикасы эшмәкәрләргә теләктәшлек фонды» (fpprt.ru) сайтларында китерелгән.

 

Язма әзерләнгән арада Айзат Газизҗанов белән янә элемтәгә чыктык.

 

– Билгеләнгән банк-агентка бардым. Бер тоткарлыксыз акчамны кайтарып бирделәр, – дигән шатлыклы тавыш ишетелде телефоннан.