Табиблар җавапка тартылудан курка (СӘБӘБЕ)

Россия табибларының 48,4 проценты даруларның начар нәтиҗәләргә китерергә мөмкинлеге турында кисәтә. Яртысыннан күбрәге дәшмәүне хуп күрә. Россия медицина учреждениеләре белән уздырылган тикшерүдә терапевтлар, хирурглар, неврологлар, анестезиологлар, клиник фармацевтлар катнашкан. Нәтиҗәләренә караганда, табибларның моңа вакыты юк.

Росздравнадзор мәгъ­лү­матларына караганда, 2015 елда организмга дарулардан булган тискәре йогынтысы турында зарланучылар саны 23 мең кешедән арткан. Әмма  бу – якынча сан.  2015 елда Росздравнадзор РФ Сәламәтлек саклау министрлыгына 44 хат җибәрелгән, аларда бер­ничә препаратның куркынычсызлыгы тикшерелүе соралган. Моннан тыш тагын 83 даруга экспертиза ясалган, аның нигезендә 23 төр дару сатудан алынган.

Чит ил фармакология җитештерүчеләр ассоциациясе башлыгы Алексей Ряхин фикеренчә, дарулар 100 процент дәвалый алмый.  Табиблар да, пациентлар да Росздравнадзорга да, фармакология ширкә­тенә дә турыдан-туры мө­рәҗәгать итә ала, әмма бик сирәкләр генә моны башкара.

Табиблар начар йогынты турында хәбәр итмәскә тырыша. Тикшерү нәти­җә­ләренә караганда, табиб­ларның 36 процентына да­руларның тискәре йогынтысы турында хәбәр итәргә вакыт җитми. Росздрав­над­зорның махсус кәгазьләрен тутырыр өчен табибка пациент белән аралашу вакытын кыскартырга туры ки­лә. Бөтендөнья сәламәтлек саклау оешмасы мәгълү­мат­ларына караганда, да­руларның начар йогынтысыннан сәбәпле үлем очраклары – иң таралган күре­неш. Европа илләрендә генә дә дарулар нәтиҗә­сендә ел саен 197 мең кеше үлә.  Чит илдә даруларның начар йогынтысы турында мөрәҗәгать итү онлайн рәвештә башкарыла. Моны табиблар да, пациентлар да җиңел башкара. Әмма Рос­сиядә табибларның дару­ларның сыйфаты турында дәшми калуының тагын бер сәбәбе бар. Алар җавапка тартылудан курка.  Дәшми калсаң, башың исән булачак.