РФ икътисади үсеш министры Алексей Улюкаев ришвәт алганда тоткарланган

Россия Президенты матбугат сәркатибе Дмитрий Песков РФ икътисади үсеш министры Алексей Улюкаевның тоткарлануын шәрехләде, дип яза "РИА Новости". Песков Улюкаевның бик җитди гаепләнүен, әлеге шикләнелүнең җитди тикшерү таләп иткәнен искәрткән. Карарны бары тик суд чыгара ала, дип өстәгән ул.

Матбугат сәркатибе ситуация турындагы хәбәрнең Путинга җиткерелгәнме, юкмы икәнен белмәвен әйткән.

Россиянең икътисади үсеш министры Алексей Улюкаев зур суммада ришвәт алганда тоткарланган. Ул "Роснефть" вәкилләреннән куркыту ысулы белән акча таләп итүдә шикләнелә, дип хәбәр иткән Интерфакс агентлыгына Тикшерү комитеты вәкиле Светлана Петренко.

Петренко Россия Куркынычсызлык Хезмәтенең Улюкаев телефонын быелның җәеннән бирле тыңлавы турында әйткән. Аның "Роснефть" вәкиле белән "Башнефть" приватизациясе хакындагы әңгәмәләрдә янап сөйләшүен ачыклаган. Әлеге материаллар җинаять эшенең нигезен тәшкил итә, дигән Петренко.

"Кулга алу барышында Улюкаев үзен яклаучыларга шалтратырга тырышты, әмма уңышка ирешмәде", - дип тә өстәгән ул.

Алексей Улюкаевны РКХ операциясе барышында тоткарлаганнар. Тикшерү фаразы буенча, Икътисади үсеш министрлыгының "Роснефть"нең "Башнефть" акцияләренең контроль пакетын алуын хуплавы өчен Улюкаевка 2 млн доллар күләмендә акча тапшырылган.

Шул ук вакытта ТКда "Башнефть" буенча килешүнең тикшерү предметы дип каралмавы хакында хәбәр иткәннәр. "Роснефть" компанияне законлы нигездә сатып алган.