ЗИННУР ПЕЛӘШ КАЛМАКЧЫ? (ФОТО)

Шансон җырчысы Зиннур (Зөлфәт Зиннуров белән бутамагыз, чөнки җырлаганда ул һәрвакыт Зиннур) чәчен пеләшкә алдырмакчы була. Бу тузга язмас идея буш урында гына барлыкка килмәгән. Эш шунда ки, тиздән Зиннурның концертлары булачак. Ә хәзер пиар-миар, имидж үзгәртү, “мөгез” чыгарусыз гына бер генә зур тамаша да узмый. Шуңа да Зиннур иң элек визажистлар белән киңәшләшкән. Тегеләр сайлап алыр өчен ике образ тәкъдим иткән: йә пеләш каласың, йә сакал җибәрәсең.

Визажистларны садистлар дип уйлый күрмәгез, алар үз эшләрен дөрес башкарган, чөнки Зиннурның репертуарына бу имидж бик тә туры килә: кайсы җырын алма – йә төрмә, йә аракы, йә социаль “бомба”.

Концертларга вакыт күп калмады. Зиннур бу арада кулында ике фото күтәреп уйланып йөри. Кайсы образны сайларга? Бер караганда, сакал җибәрү отышлырак – концерт бетүгә үк кырып атасың. Ә икенче яктан, пеләш калу күпкә көчлерәк адым. Такыр башлы Зиннур күпләрнең куркыныч төшләренә кереп, бик озакка истә калыр иде. Ни кызык, бу ике образны сайлауда җырчының дуслары да баш вата. Инде ике лагерьгә бүленгәннәр. Зиннурның пеләш калуына күбрәк кызлар каршы. Ә егетләр, киресенчә, “әйдә, үзем кыркыйм” дип торалар. Кем ягы җиңәр? Мөгаен, егетләр ягыдыр. Беренчедән, Зиннурның авантюрист икәнен күптән беләбез. Ә, икенчедән, кызларның чәчне саклап калырга өндәүләре начар эффект бирде, чөнки Зиннур һәрвакыт кызлар сүзенә каршы эшли. Хәер, ниләр булып бетәсен концертта гына белә алачакбыз...  

Концертлар исә 21 ноябрь көнне Сабада, 22се – Чаллының Сара Садыйкова исемендәге концертлар залында (Мэрия), 23се – Казанның Филармониясендә булачак.  Катнашалар: Айдар Тимербаев, Алия Исрафилова, Айгөл Бариева (Казан концертында гына) һ.б.

Зиннур шушы ике образның үзенә кайсысын сайлар?