Татарстанда бер егет йөргән кызының интим видеосын танышларына тараткан

Россия Тикшерү комитетының Татарстан буенча идарәсе Казан шәһәренең Мәскәү районы буенча бүлеге тарафыннан әлеге җинаять эше тикшерелеп беткән. 30 яшьлек Р. Н. РФ Җинаять кодексының ике маддәсе буенча гаепләнелә. Эш судка тапшырылган.

Тикшерү мәгълүматларыннан аңлашылганча, быелның 4 июнендә аек хәлдә булмаган Н. бер кафеда үзенең 19 яшьлек дус кызы белән җенси мөнәсәбәткә керә һәм әлеге гамәлләрен кәрәзле телефоны ярдәмендә видеога төшерә. Болай эшләргә кыздан рөхсәт алынмаган була. Соңрак, кабат кызның рөхсәтеннән башка, әлеге видеоязма уртак дусларга таратыла.
 
Бу хакта белеп алган кыз хокук саклау органына гариза яза. Эксперт комиссия әлеге видеоязманы порнографик язма дип бәяләде.

Суд карары нигезендә сак астына алынган Н. үз гаебен танымаган.