|
|
Бүген кемнәр туган
|
|
Архив
|
04.09.2016 Хәйрия
Улым сүзләр әйтә башлады!“Тормыштагы бар шатлыгым – улым”, – ди Түбән Камада яшәүче Алинә Гатина. Салкын тидереп чирли дип уйлаган балага табиблар әллә ничә диагноз куя. Башта беркем дә малайның ни белән авырганын белми. Ә аннары күңелне өшеткеч хәбәр килеп җитә – балада эпилепсия авыруы диләр. Өстәвенә әнисенә: “Улыгызда Расмуссен энцефалиты”, – дигән колак ишетмәгән диагноз турында җиткерәләр. – Улым 2012 елда дөньяга килде. Тупырдап торган бала. Ирем белән улыма карап сөенеп туя алмадык. Бар да әйбәт кебек иде. Улыма 3 яшь тулыр алдыннан аңа салкын тиде. Бик нык ютәлли башлады. Кичкә тән температурасы да күтәрелде, – дип сөйли Алинә. – Авыруына өч көн дигәндә, балабыз бик каты итеп тирли башлады. Гел су сорап торды. Шул чакта өянәкләре башланды. Без тизрәк “ашыгыч ярдәм” машинасы чакырттык. Табиблар баланы реанимация бүлегенә алып китте. Өянәккә каршы дарулар биреп карадылар. Түбән Кама табиблары тиз арада Республика балалар клиникасыннан табиб чакыртты. Ә ул исә безне Казанга күчерде. Менә шулай итеп без балабызның гомерен саклап калдык.
Авырганчы башка сау-сәламәт балалар кебек йөри дә, утыра да, сөйләшә дә алган сабый бу вакыйгадан соң бөтенләй башка төрлегә әйләнә. Өянәкләр баш миенә тәэсир итми калмый. Радель йөри алмый башлый һәм сөйләшүдән туктый. Малай көненә әллә ничә өянәк кичерә. Аңа инде табиблар язган дарулар да булышмый башлый. Шуннан соң Гатиннар гаиләсе, чит ил клиникалары булыша алмасмы дип, төрле җирләргә хат юллый.
Германия табиблары Радельне дәваларга алына. Шул чакта балага чит илдә 3 миллион сумлык операция ясаталар. “Ике яктан әти-әниләребез ярдәме, үзебезнең булган акчаларны җыеп бардык. Бурычка да алып тордык. Чит ил табиблары баланың сул як баш миенә зыян килгәнен әйттеләр. Хәзер аның бары тик уң як баш мие генә эшли икән. Операциянең уңышлымы-юкмы икәнен алар бары тик өч айдан соң гына әйтәчәк. Әмма миңа, әни буларак, үзгәрешләр сизелә инде. Сабыем элеккеге тормышны исенә төшерә башлады. Сүзләр дә әйтә. Түбән Камада тернәкләндерү үзәкләренә йөрибез. Аның да нәтиҗәсе күренә. Тиздән октябрь аенда кабат Германиягә барасыбыз бар. Анда барырга инде үзебезнең генә матди мөмкинлек җитми. Ирем тапкан акча тормышны алып барыр өчен, даруларга китеп бара. Изге күңелле кешеләр ярдәм итмәсме дип, газета укучыларга мөрәҗәгать итәргә булдык”, – ди Алинә.
4 яшьлек Радельнең тизрәк терелеп аякка басасы, яшьтәшләре белән бергә бакчага йөрисе килә. Әлегә бу аның өчен хыял гына. Малайның язмышы мәрхәмәтле кешеләр һәм табиблар кулында. Бергәләп тотынсак, Гатиннар гаиләсенә ярдәм итә алабыз.
Радельгә булышырга теләүчеләр өчен исәп-хисап реквизитлары:
Сбербанк 4276 6200 2344 1185
Получатель – Гатина Алина Рустемовна
Киви кошелек +79178875999
Яндекс деньги 4100 1338 0190 349
Билайн +79600593597
Ак Барс Банк 5209 3512 2701 8566
Получатель – Гатина Алина Рустемовна
--- |
Иң күп укылган
|