Испаниядә яхтада үлгән Ләйлә Солтангәрәеваны Казанда җирләделәр

Казанда июнь башында Испаниядә яхтада үлгән 28 яшьлек Ләйлә Солтангәрәева белән бәхилләштеләр. Зиратка кызның дуслары һәм туганнары җыелган иде. ММЧда Ләйлә үлеменең төрле сәбәпләре турында язылды. Әмма кызның үлеме турындагы рәсми нәтиҗәдә аның сөрем газыннан агуланып үлүе язылган.

Бу хакта "Татар-информ" агентлыгына кызның әтисе әйтте.

Ләйләнең үлеме турындагы хәбәрне туганнары һәм дуслары авыр кичергән. Матбугатта аның үлемнең сәбәпләре дип наркотиклар һәм алкоголь аталуы туганнарының ачуын кузгаткан.

Алар сүзенчә, Ләйлә сәламәт яшәү рәвеше алып барган. Соңгы өч елда иттән баш тартып, вегетарианнарча тукланган. Исерткеч эчемлекләр белән дә мавыкмаган.

Кыз музыканы аеруча яраткан. 2007 елда И.В.Әүһәдиев исемендәге музыка училищесын фортепиано классы буенча кызыл дипломга тәмамлаган. Төрле конкурсларда катнашкан, алар арасында иң җитдие - Голландиядә узган Piano Competition.

2007 елда Ләйлә Мәскәүдәге Дәүләт идарә университетына "Музыка бизнесы һәм күңел ачулар индустриясендә менеджмент" факультетына укырга кергән. Ләйлә продюсерлык белән шөгыльләнергә уйлап, җырлар яза башлаган. Ул продюсерлык өчен акча күп кирәк булуны аңлаган, шуңа да хатын-кызлар өчен Италиядә тегелгән киемнәр кибетен ачарга карар иткән. Бу эш белән шөгыльләнгән вакытта аңа Италиядә күп булырга туры килгән. Кыз итальян телен өйрәнгән, бу аңа яхталар сату, ремонтлау һәм арендага бирү белән шөгыльләнүче Priority компаниясенә эшкә урнашу мөмкинлеген биргән.

Ләйлә авыру энесенә дә еш булышкан. Берничә тапкыр аны чит илдә дәвалауны оештырган.

Ләйлә турында сөйләгәндә,  дуслары һәм танышлары аны бары яхшы яктан гына искә ала.