30.05.2016 Шоу-бизнес

Роза Сябитова Беренче каналда татар биюен биеп күрсәтте (ВИДЕО)

Русиянең иң танылган димчесе Роза Сябитова Беренче каналда чыга торган “Без страховки” телетамашасында татар биюе башкарды. Шоуның ярымфиналында җиңелгәннән соң, Роза проекттан китәргә тиеш иде, тик аны калдырдылар.

Розаның ярымфиналга җитүе дә шактый зур батырлык саналды – чөнки ул бер биремне үтәгәндә аягын имгәтте. Шуңа да карамастан, ярымфиналга җитте, тик финалга узарга баллары җитмичә, төшеп калды. Шулай да ярышның хөкемдарлары Сябитовага финалда мәртәбәле кунак буларак чыгыш ясарга рөхсәт итте.

«Проект кагыйдәләре буенча Роза китәргә тиеш иде. Әлбәттә, бөтенесе дә аның калуын теләде, һәм ул калды да! Аны калдырып дөрес эшләделәр! Ул бит берүзе генә килмәде, аның артында бөтен татар халкы тора!”, - дип игълан итте алып баручы Яна Чурикова.

Биюне “Ильдан” ансамбле җитәкчесе, Татарстанның атказанган мәдәнят хезмәткәре Рәдиф Яваев куйган.

Роза Сябитованың “Без страховки” тамашасында катнашуы искитәрлек вакыйга булды. 53 яшьлек Роза тамаша мәйданында кеше ышанмаслык әйберләр ясап күрсәтте, кыюлыгы белән жюри әгъзаларын да, тамашачыны да шаккаттырды. Батутта чыгыш ясарга әзерләнгәндә ялгыш килеп төшеп, аягын имгәтте. Шунда да Роза туктап калмады, “шоудан китмим”, - дип, ярышта калды. Башкалар чыгыш ясаганда гипслы аягы белән, култык таякларына таянган килеш тамаша уза торган мәйданчыка килеп йөрде. Аягы төзәлгәч, янәдән сафка кайтты. Тик ярымфиналдан ары уза алмады.

Роза Сябитова чыгышы видеода 50.43 нче минуттан башлана.

---
Матбугат.ру
№ --- | 30.05.2016