Исемең сәер – кемнәр куйган...

Ширкәт җитәкчелеге яңа туңдырма турында: “Тышлыкка мөлаем бер персонажның рә­семе ясалды. Кара тәнле ма­лайның колагында – алка, аягында – беләзек, кулында – эскимо”, – дип сөйләде. Исемгә килгәндә, фабрика җитәкчелеген мондый фикергә 1967 елда чыккан “Максимка” фильмы этәргән булып чыкты. Алар кинофильмдагы корабта юнга булып эшләгән, чыгышы белән афроамерикан булган малайга мөкиббән киткәннәр икән.

 

Тик исем белән арттырып җибәргәннәр. Чаллы җитештерү­челәренең даны Россиягә генә түгел, чит илгә дә таралып өлгерде. Бу вакыйга Европа, АКШ матбугатында да чәйнәлде. The New York Post газетасы, “Обамка” туңдыр­масы белән аерым ке­шеләр Мәс­кәү белән Вашингтон арасындагы салкын мөнә­сәбәтләрне исәпкә алып, керем­нәрен арттырырга тели, дип язып чыкты. 

Reuters агентлыгына исемен атарга теләмәгән американ түрә, “Обамка” исемле туңдырманың барлыкка килүе Россиядә АКШка каршы барган кампаниянең бер чагылышы, дип белдергән. Бөек­- б­ританиянең The Times газетасы моны, көндәлек расизм үрнәге, дип язып чыкты. Россиядә АКШ илчелегенең пресс-атташесы Виль­ям Стивенс “Реальное вре­мя”га туңдырма җи­тештерүне: “Соң­гы вакытта Рос­сиядә Америкага каршылык киң җәелде, бу хәл дискриминация һәм расизм рә­вешен алганда бигрәк тә кызганыч”, – дип бел­дергән.

 

Шау-шу зурга китте, чаллыларга акланырга туры килде. “Исем, атамалар җиңел истә калырга тиеш. Хыялланырга яратучыларда, күзаллавы яхшы булган кешеләрдә исем төрле ассоциа­цияләр тудыра ала. Әмма без чыгарган продукция балалар өчен. Ә алар сәясәттән ерак тора”, – дип язды “Славица” ширкәте үзе­нең рәсми матбугат релизында. Россиянең кайбер мәгълүмат чаралары әлеге исем белән туң­дыр­ма сынау рәвешендә генә җитештерелгән булган дип язып чыкты. Әмма “Славица”ның финанс директоры Анатолий Рә­хим­ханов 29 апрель көнне “Фейсбук”та туңдырма даими җитештерүгә куелды, дип язган иде. 11 майда исә Рәхимханов бу язуны һәм фотоларны үз битен­нән алып аткан булып чыкты. Ширкәттә дә: “Бездә “Обамка” исеме белән туңдырма җитеш­терелмәде”, – дип әйтәләр.

 

Россиядә расизм чаткылары белән товар җитештерүнең беренче очрагы гына түгел бу. Яңа ел бәйрәме алдыннан Санкт-Петербургтагы “Евростиль” ҖЧҖ АКШ президенты Барак Обаманы, кара тәнле булуына ишарәләп, маймыл баласы итеп сурәтләгән такталарны сатуга чыгарган иде. Куна такталары Казандагы “Бәхет­ле” ки­бет­ләрендә дә сатылды. АКШның Россиядәге илчелеге әлеге хәлгә ризасызлык бел­дергәч, такталар сатудан алынды, “Бәхетле” шир­кәте гафу үтенде.

 

Россиядә “Путинка”, “ВВП”, “Медведев”, “Нацпроект”, “Кремлевская” кебек аракылар да чыга. Сүз уңаеннан, аракы маркасында билгеле кешеләрнең, сәя­сәтчеләрнең исемен куллануны тыйган закон проекты бар иде, әмма ул ни өчендер тор­мышка ашырылмады.