Дәүләт гаепләүчесе табибны үтерүдә шикле Мисбах картны 7 елга катгый режимлы колониягә хөкем итүләрен сорый

Яр Чаллыда дәүләт гаепләүчесе табиб-травмотологны үтерүдә гаепләнүче 85 яшьлек Мисбах Сәхабетдиновны 7 елга катгый режимлы колониягә хөкем итүләрен сорады, дип хәбәр итә ТР прокуратурасы. Өлкән яшьтәге ир-ат РФ Җинаять кодексының 223нче маддәсенең 1нче өлеше (“Законсыз рәвештә корал җитештерү”), 222нче маддәсенең 1нче өлеше (“Законсыз рәвештә корал саклау”), 30нчы маддәсенең 3нче өлеше (“Кеше үтерергә омтылу”), 105нче маддәсенең 1нче өлешендә (“Кеше үтерү”) каралган җинаятьләр кылуда гаепләнә.

Тикшерү версиясе буенча, 2008 елның 8 июлендә Мисбах Сәхабетдинов кул бармагы җәрәхәтләнү, имгәнү сәбәпле, медицина ярдәме сорап, шәһәрнең 4нче поликлиникасына мөрәҗәгать итә. Табиб-травмотолог аннан түбәтәен салуын сорый. Әмма пенсионер баш киемен салудан баш тарта. Шуннан соң аны мәҗбүриләп кабинеттан алып чыгып китәләр.

Бу низагтан соң шикләнелүче табибтан үч алырга була. 2008 елның июленнән 2013 елның августына кадәр бабай Тукай районы Яңа Мусабай авылындагы йортында 7,4 мм калибрлы патрон белән атуга яраклы һәм кул таягы (трость) рәвешендә 1 залплы утлы корал ясый.

2014 елның маенда ул табибны күкрәгенә үзе ясаган коралдан атып үтермәкче була. Әмма бабай, коралы төзек булмау сәбәпле, бу явыз ниятен гамәлгә ашыра алмый.

2015 елның декабрендә М.Сәхабетдинов табибны 4нче поликлиника ишеге төбендә сагалап тора һәм шушы таяк рәвешендәге коралдан аның аркасына төбәп ут ача. Зыян күрүче ашыгыч медицина ярдәме хастаханәсенә (БСМП) клиник үлем хәлендә китерелә, биредә аңа операция ясала, әмма табибның гомерен саклап кала алмыйлар: ул җан бирә.