|
|
Бүген кемнәр туган
|
|
Архив
|
29.02.2016 Спорт
20 нче "Салават Кубогы" үз иясен тапты (ФОТО)Чаллыда 20 нче тапкыр “Салават Кубогы”на автомобильдә узышлар үтте. Чаллы ипподромы йөзләгән автоспортчыны үзенә җыйды. Илдәге бердәнбер хәйрия автомобиль трек ярышлары “Россия балалар фонды”ның Татарстан бүлеге рәисе, популяр җырчы, Татарстанның халык артисты Салават Фәтхетдинов инициативасы буенча оештырыла. 20 ел дәвамында старт түләүләре һәм бүләк фондының бер өлешеннән җыелган акча Чаллы балалар йортына бирелә. Быелгы ярышлар кышкы трек автоузышлары буенча ТР Чемпионаты һәм Россия Кубогының өченче этабы белән бергә узды. Юбилей ярышлары гадәттәгечә танылган автоузышчылар катнашында үтте. “Салават Кубогы”нда Тверь, Тамбов, Самара, Йошкар-Ола, шулай ук Татарстан шәһәрләреннән барлыгы егермедән артык узышчы катнашты. Тамашачылар Рәис Миңнеханов, Тимур Тимерҗанов, Рафаэль Фәттахов, Тимур Шиһабетдинов, Наталья Гольцова, Елена Зорина кебек узышчыларның мавыктыргыч көч сынашуын карый алды. Быелгы "Салават Кубогы"ның иясе булып Түбән Кама автоузышчысы Олег Жаворонков танылды, дип хәбәр итә ТР Президенты каршындагы Мәдәниятне үстерүгә ярдәм итү фондының матбугат хезмәте. Олег Жаворонков һәм икенче урын яулаган Айдар Нуриев ТР Президенты каршындагы Мәдәниятне үстерүгә ярдәм итү фонды тарафыннан акчалата сертификат белән бүләкләнде. Тантаналы мизгелләр вакытында фондның башкаручы директоры Нурия Һашимова катнашучыларны ТР Президенты аппараты җитәкчесе Әсгать Сәфәров исеменнән тәбрикләде. Моңа кадәр язган идек: Салават оештырган автоузышта бүген зур һәлакәт килеп чыкты, хатын-кыз пилот, хәтта, аңын җуйды (ВИДЕО)
--- |
Иң күп укылган
|