Грипп бетәргә озак калмады

 

Вакытында дәва­ла­на башлагангамы, чирне өч көннән җиңдек. 37,5 градус­ка күтә­релгән температура өч көн буе төшмәде. Педиатр белән беренче көнне үк шалтыратып киңәштек. “Температура 38дән артмаса, аны төшерү өчен дару эчмәскә, ике сәгать саен вируска каршы препарат биреп торырга, тамакны чайкарга, борынга дару салырга, лимон, мүк җиләге чәе эчәргә“, – дип киңәш итте педиатр Лариса Сергеева. Укытучыбыз Альбина Галиәх­мәтованың, балада аз гына салкын тию бил­геләре сиз­сәгез дә, мәктәпкә җи­бәрмәгез, бер-ике көн өйдә ятып дәва­лансын, дигән ки­ңәшләре ярдәм иттеме, шөкер, балалар арасында озаклап, ныклап чирләп ятучылар булмаган. Гому­мән, мәктәбебездә бер генә сыйныф та карантинга ябылмады.

 

A(H1N1)2009 штаммы гриппы, ягъни дуңгыз чире белән Татарстанда ике ай эчендә 111 кеше авырган. 57 очрак февральдә теркәлгән. Вируслы чир күбрәк Казанда, Чаллыда яшәүчеләрдә табылган. Шулай ук  Яшел Үзән, Мөслим, Әлмәт, Чистай районнарында да авыручылар бар. Ә тирән сулыш юллары йогышлы инфекциясе белән авырып, дәвалау оешмаларына мөрәҗәгать итүчеләр саны 30 меңнән артык. Авыручылар арасында мәктәп  укучылары шактый. Казанда уннан артык мәгариф оеш­масының кайбер сыйныфларында  авыручылар күп булу аркасында укулар туктатылган. 

 

Сәламәтлек саклау министрлыгы мәгълүматлары буенча, Татарстанда  үпкә ялкынсынудан ике кеше үлгән. Берсе – ике айлык сабый. Россия сәламәтлек саклау министры Вероника Скворцова ел башында бик көчле грипп килүен хәбәр итсә, шушы көннәрдә озакламый, ягъни  февраль азагында грипп чоры тәмамланачагын әйтте. Битлекләрне салырга санаулы көннәр калып бара. Быелгы сезонда чирдән сак­лану ниятеннән битлек киеп йөрүчеләрне күбрәк очраттык кебек. Берара хәтта дару­ханәләрдә битлекләр, профилактика уңаеннан чыгарылган арзанлы дарулар, майлар да бетеп торды. Провизорлар бу хәлне, иртән сатуга чыгарабыз, төшкә кадәр алып бете­рәләр, дип аңлат­тылар.

 

Ә ил буенча алганда грипп һәм ОРВИ белән 3,5 миллион кеше авырган. Бу күрсәткеч башка еллар бе­лән чагыштырганда бер­ничә про­­центка күбрәк, диләр. Ай буена сузылган грипп эпидемиясе 74 тө­бәктә һаман да эпидемия бусагасыннан югарырак. Бигрәк тә Свердловск, Калининград, Самара, Кемерово өлкәләрендә эпи­де­миянең кызган мәле. Ә Ерак Көнчы­гышка йогышлы чир әле үтеп кенә кергән. Табиб­лар анда эпидемиянең февраль азагында булачагын фаразлый.  Дуңгыз грип­пы­ның беренче билгеләре га­дәти гриппныкы кебек. Температура күтәрелә, тө­чкертә, йөт­кертә, буыннар сызлый, баш авырта, хәл китә, тән калтырый, ашказаны авырта. Чирне вакытында авыз­лык­­ла­масаң, бер-ике көн­нән үп­кә кабарып, ялкынсыну чире китереп чыгарырга мөмкин. Ул шул яктан куркыныч та.

 

Апас районы газетасында эшләүче каләмдәшебез белән сөйләшкән идем, ОРВИ белән чирләүчеләр булса да, грипп үзен ул кадәр сиздер­мәде, ди ул. Яшел Үзән райо­нының Олы Ключи авылы табиблык амбулаториясе педиатры Фәрит Акмалов та: “Быел авыручылар узган елдагылардан күбрәк дип әйтмәс идем”, – ди. Берничә ел элек вирус авыр узган иде, шактый кешене аяктан екты, балалар да нык чирләде, дип кисәтә табиб. ОРЗ белән авыручы балаларның байтагы өйдә дәваланган, авыр хәлдә хас­таханәгә озату очраклары булмаган. Районда бер генә балалар бакчасы да, мәктәп тә карантинга ябылмаган.

 

– Ике ай дәвамында кояш күренмәде диярлек, көннәр болытлы торды. Бу хәл дә чирнең артуына китерә. Ә кояшта вирус тизрәк үлә, – ди Фәрит Әхмәт улы. – Профилактика чарасы буларак, балаларны күбрәк урамда, һавада йөртергә кирәк. Йончыган иммунитетны рәткә кертү өчен кибеттән сатып алган татлы ризыклар, сок­лар урынына күбрәк өйдә әзерләнгән ит, сөт ризыклары ашатыгыз, җиләк-җимеш компотлары эчертегез. Яз көне организм болай да йончый, шуңа күрә витаминнар эчәргә була.