“Газетада язма чык­кач, счетыма акчалар килә башлады. Рәхмәт сезгә!”

Баш өстендә түбәсез калган гаилә ярдәм сорап җитәкчеләр бусагасын таптый. Аларга кеч­кенә генә бер бүлмә бирәләр. Әмма анда юыныр өчен хәтта душ та булмый. Ә тол калган Резидә ханымның өч баласы бар. Җит­мәсә, берсе – тумыштан инвалид. Язма дөнья күргәннән соң, редакциягә шалтыратучылар күп булды. Казаннан ике кеше телевизор тәкъдим итте. Әлмәт районыннан шалтыраткан 81 яшьлек Әдип абый исә акча бирергә җыена икән. “Пенсионер булсам соң? Ярдәм итәрлек көчебез бар. Зәкят булыр”, – диде ул.

 

Менә шунда олы кешеләр алдында акча җибәрү проблемасы килеп басты. Әгерҗе районы газетасы баш мөхәррире Рәмзия ханым Зариповадан ярдәм сорарга булдык. Ул акчаны күчерер өчен үзенең банк картасы номерын әйтте. Шулай итеп, 81 яшьлек бабай районга барып, бу гаиләгә акча җибәрде. “Җиде ме­ңенә – телевизор, калганына уен­чыклар алсыннар”, – дип ки­ңәш бирде ул. Тик акча килеп җит­кәнче, балага телевизор да ки­тергәннәр, уенчык машина да сатып алган булганнар. Шуңа күрә Әдип абыйлар җибәргән ярдәм­не ут чыбыкларын алыштыру өчен тотканнар. Бу эшне дә Рәм­зия ханым үзе башлап йөргән. “Бүлмәдәге ут чыбыклары начар хәлдә иде. Мөхәммәт­җановаларга янгын сүндерү хезмәткәрләре дә килеп кисәтү ясаган булган. Шуны истә тотып, килгән акчаны әрәм итмичә, ут чыбыкларын алыштырып, калганын кулларына бирдек”, – ди Рәмзия Сабировна.

 

Шул арада Минзәлә районы, Наратлы Кичү авылыннан Рәм­зия исемле ханым шалтыратып ярдәм итәргә җыенганнарын бел­дерде. Аларга исәп-хисап сче­тын җиткердек. Ә Чаллы шә­һәрендә яшәүче Гөлфия ханым, бу гаиләгә акчалата түгел, күч­тәнәч белән булышам, диде. Ад­ресларын сорап алып, машина белән үзе илтеп бирергә вәгъдә бирде. Тамчыдан күл җыела, ди­гәннәре әнә шул инде. Рес­пуб­ликаның төрле районнарында яшәүчеләр бу гаиләгә чын кү­ңелдән булышты. Әле исем­нә­ре язылмаган кешеләр дә шактый булды. Алар үзләре шундый шарт куйды. “Яхшылык эшлә дә суга сал, халык белмәсә – балык белер”, – диләр бит. Исеме билге­сез дусларыбыз тагын бар әле. Газетада авыру балалар турында язган саен үзеннән өлеш кертүче бер абзыебыз Минзәләдә яши. Тагын бер изге күңелле кеше Чүпрәле кызы Райлә Сатдиновага ярдәм итте. “Газетада язма чык­кач, счетыма акчалар килә башлады. Рәхмәт сезгә!”– ди Райлә.

 

Татар халкының бердәм булып, бер-берсенә ярдәм итеп яшәве элек-электән килә. Күңел­ләребезне мүк баскан, кеше кайгысына битараф калабыз, дисәк тә, ярдәмләшеп яши беләбез. Тормыш булгач, бар да кирәк! Әнә Яшел Үзән районы, Бакырчы авылында яшәүче 92 яшьлек Рәбига Дәминованың телевизоры ватылган икән. “Берәр кеше килеп төзәтмәс микән?”– ди ул. Әгәр андый мәрхәмәтле кеше табылса, без ике арада күпер салырга әзер. Әбигә булышырга теләүче булса, 89872076910 телефон номерына шалтырата ала.