ГӨЛНАЗ СӘФӘРОВА ТУЕНА ЧӘЧӘКЛӘРНЕ МЕКСИКАДАН 10 КӨН КАЙТАРГАННАР

«TATAR RADIOSi» ди-джее һәм танылган шоу-вумен Гөлназ Сәфәрова кияүгә чыкты. Бер дә белмәгән кешегә түгел – Ленар Мухинга. Ленар - композитор һәм аранжировщик Марат Мухинның абыйсы. Маратны беләсездер – ул Дилә Нигъмәтуллинаның ире. Ну ә Дилә инде Булат Нигъмәтуллинның сеңлесе. Менә шундый “Санта-Барбара”.

               Монысы шаяру иде. Ә хәзер җитди мәгълүмат. Гөлназ һәм Ленар туе 18 апрель көнне Казандагы “Мизон Гриз” ресторанында булды. Яшьләр Үзәк загста язылыштылар, Кремльдә, Кол-Шәриф мәчетендә булдылар. Кол-Шәриф янында Гөлназга бераз чабып йөрергә дә туры килде әле, чөнки фатасы очып киткәләде. Ул көнне бик җилле иде шул. Яшьләр башта яңгыр булыр дип тә курыкканнар, инде самолет белән болытларны да кумакчы булганнар ди, тик бу бик кыйммәт нәрсә икән. Яңгыр исә нәкъ туй беткәнне көтте - төнге уникедә ява башлады.

                Туйны Ләйсән Ветрова (Сөләйманова) алып барды. “Сәләт” яшьләр хәрәкәтенең юлбашчысы Җәүдәт Сөләймановның сеңлесе ул. Шаһитләр – Айназ белән Саша. Ленар кәләшен алырга лимузин белән килде. Гөлназ исә бу турыда алдан кисәтелмәгән. “Минем өчен бу сюрприз булды”, - ди ул. Тагын бер сюрприз – туй вакытында өч җирдән 18 тапкыр салют аттырдылар. Ни өчен 18? 18нче апрель бит! Символик күренешләр әле моның белән генә тәмамланмый. Гөлназның балдагында 7 брилииант була, ә кулында 7 чәчәктән торган букет. Бу бәйләмне махсус туй мәҗлесенә дип Мексикадан 10 көн буе кайтарганнар, чөнки Казанда (күрәсең, бөтен Россиядә дә) Гөлназның оригиналь төстәге туй күлмәгенә яраклы чәчәкләр табылмаган. Кәләш тә кияүне сюрпризсыз калдырмады – романтик музыка уйнаганда шәмнәр белән бизәлгән йөрәк формасындагы торт чыгарды.

                 Туйда Казан дәүләт мәдәният һәм сәнгать академиясеннән, Татар дәүләт гуманитар-педагогия институтыннан һәм Казан дәүләт университетыннан зур галимнәр бар иде. Шул исәптән КДУның Журналистика һәм социология факультеты деканы Васил Заһитович Гарифуллин да. Моннан тыш шоу-бизнес әһелләре дә күп иде: Дилә Нигъмәтуллина, Марат Мухин, Булат Нигъмәтуллин, Ләйсән Гимаева, Булат Бәйрәмов, Иркә, Раяз Фасыйхов, Радик Артемьев, Зөлфәт Зиннуров һ.б.

                 Гөлназ һәм Ленарның туенда әйтелгән барлык котлауларга без дә кушылабыз. Чын күңелдән!