Кеше организмы рекордлары

1985 елда Англиядә бер балыкчы, корабль әйләнеп каплангач, бозлы суда 5 сәгатьтән артык йөзгән, ә яр буена җиткәч, карлы җирдән тагын 3 сәгать ялантәпи барган. Аның иптәшләре исә корабль батуга 10 минут эчендә катып үлгәннәр.

Моннан берничә ел элек Норвегиядә биш яшьлек малай боз астына киткән. Аны 40 минуттан соң гына табып алганнар. Ясалма сулыш һәм йөрәгенә массаж ясагач, ул селкенә башлаган, ә ике тәүлектән аңына килгән.

1986 елда 40 яшьлек француз Жан-Луи Этьен ике айга якын вакыт эчендә чаңгыда Канада ярларыннан Төньяк полюска кадәр ялгызы 42 градус салкында 1200 чакрым юл үткән. Ул ике тапкыр боз астына киткән, 8 кило авырлыгын югалткан, әмма максатына ирешкән.

1960 елның гыйнварында дүрт совет солдаты (Ә.Җиһаншин, Ф. Поплавский, А. Крючковский, И Федотов) утырган баржаны көчле җил Тын океанга алып киткән. Икенче көнне баржада ягулык беткән, рация эштән чыккан. 30 көннән ашарга бер валчык әйбер дә калмаган. Егетләр киез итекләрен өзгәләп ашаганнар, ә эчәр су бер кешегә тәүлегенә 3 йотым гына тәшкил иткән. Аларны 49 көннән соң коткарганнар, барысы да исән калганнар.

АКШта яшәгән иң юан кешеләрнең берсе Билли Макгир (315 кило авырлыкта) көн саен иртәнге ашка 18 йомырка, 2 кило шпик, бер ипи ашаган, 1 литр сок һәм 16 стакан кофе эчкән. Әбәде һәм кичке ашы рационы, гомумән, шаккатарлык булган.