“Матбугат.ру” аша танышып-кавышып, 2 бала үстереп ятабыз” (МӘХӘББӘТ ТАРИХЫ)

Ул көнне язучылар куп булды монысы, белмим нигәдер, күңелгә ятып калды. Ул кичне смс аша гына аралаштык. Икенче көнне шалтыратышып сөйлаштек. Кичке сагать җидегә мин свидание билгеләдем. Эштән кайтып төштем, сәгать җиденче ярты булып килә иде инде. Сизенеп торам, җидега барып жита алмыйм. Шалтыратам, телефонынын алмый. Хәтерләсәгез, Универсиада алды бөтен шәһәр пробкалар белән тулы чак иде. Мин Сафиуллин урамында торам, ул Ибраһимов проспектында. Сәгать җиде тулганда кире шалтыратты бу миңа. Мин әйтәм өлгермим дим. Ярар алайса, булмас инде очрашып бүген ди. Мин үз сүземдә торам, мин киләм димен. Ярар, ризалашты. Киттем чыгып, 3 сәгатькә якын бардым Ибраһимов урамына кадәр. Мин алар йорты янына барып җиткәндә сәгать ун тула иде инде. Шалтыратам, тагын алмый телефонын, яңадан шалтыратам, алмый. Бер 15 минут көтеп утыргач, киредән шалтырата бу миңа, мин чыгам ди. Шуннан чыкты, күрештек. Шуннан күңелгә кереп ятты бу кыз. 

 

14 апрель көнне көндез очраштык. Минем дә эшем иртә бетте, ә Рузиянең ял көне иде. Паркларда йөрдек, караңгы төшеп килә. Мин Рузияне машинага утырттым да, авылга әти-әни янына алып кайтып киттем. Казаннан кузгалганда әтиләргә шалтыратып хәбәр бирдем, кунак алып кайтам дип. Әти көлә, әллә өйләнәсеңме ди. Күптән көтәләр иде инде мин өйләнгәнне. Мин әйтәм өйләнәм дим. Менә шулай әтиләр белән таныштырып алып килдем әти-әни белән Рузияне. 

 

Көн дә киләм Рузия янына, сәгать кичке унмы, җидеме барыбер киләм. Ул да чыга минем янга. Көн саен очрашып йөрдек. Май бәйрәмнәренә Рузия 10 көн ял алды да авылга кайтып китте. Балалар бакчасында тәрбияче булып эшли ул минем. 29 апрель кичендә мин 10 көнгә авылга китәм, башканы табып куя күрмә ди бу миңа. Мин аптырап тормадым, мин дә синең белән кайтам дим. Аптырап калды бу. 30 апрель көнне килеп алдым да утыртып алып кайтып киттем Рузиямне авылларына. Безгә төпчек балдыз иярде, апаны үзен генә җибәрмим ди, мин дә сезнең белән кайтам ди. Кереп алдык балдызны. Кайтып төштек авылга. Әби белән бабай көтеп торалар иде. Шулай итеп әби-бабай белән танышып килдем. 

 

Киткәндә мин 9 майга сине алмага кайтам, үзем генә килмим, әтиләр белән киләм дип киттем. Ул ышанмыйча калды. Көненә 80-90 смс языша идек, 30-40 мәртәбә көненә шалтыратыша идек ул авылда вакытта. Телефон юньләп тотмый авылларында. 8 май көнне шалтыратып әйттем иртәгә көтегез дип. Рузия һаман ышанмый. Соңыннан әйтте, сүзләренә ышанмасам, да күңелем белән көттем ди. 

 

9 май көнне иртән әтилар килеп җиттеләр авылдан. Әзерләнеп көтеп торалар иде. 9 июнь көненә никах билгеләдек. Никахыбыз “Кол Шәриф” мәчетендә узды. Туй көнен билгеләп утырабыз. Минем энем шалтырата, мин ди туй көнегезне билгеләдем ди, мин ничек димен? Ул ЗАГС сайтына кереп анда буш вакыт тапкан да, язылып та куйган. Ул көн 13 июль иде, Рузиянең туган көне көнне булды. Шулай итеп, үзебез дә уйламыйча бер юлы ике бәйрәм бергә кушылды. Ул көн әле шуның өстенә пятница 13 булып чыкты. Безнең гаиләдә төрле ышануларга табыну юк анысы. Туебызны Татарстанның, Башкортстанның атаклы пародисты, тамадасы Мирхәт Гайсин алып барды. Аңа булган рәхмәтебезнең иге-чиге юк, бик матур алып барды. 

 

Менә шулай, “Матбугат.ру” сайтында табигатьнең иң матур, яшәреп килгән вакытында таныштык, 4 ай эчендә ямьле җәй айларында кавыштык. Бер елдан14 июнь көнне Олы улыбыз Солтан туды. Нәкъ ике елдан, бөтендөнья балаларны яклау көнендә 1 июньдә кече улыбыз Исламны алып кайттык. Менә шулай итеп, дүртенче елыбызны яшәп ятабыз.