Чемпионат вакытында Перу кунаклары Бөекбритания гражданинының планшетын һәм акчасын чәлдергән

Казанда спортның су төрләре буенча дөнья чемпионаты узган көннәрдә җитди гадәттән тыш хәлләр теркәлмәгән. Шәһәр халкының һәм башкала кунакларының, ярышта катнашучыларның иминлеген 7,5 меңнән артык полиция һәм эчке гаскәрләрнең хәрби хезмәткәрләре тәэмин иткән.

Татарстан башкаласында ФИНА-2015 Дөнья чемпионаты узган көннәрдә оператив хезмәтләрнең эше ничек оештырылганлыгы турында бүген Казан Мэриясендә үткән брифингта Россия Эчке эшләр министрлыгының Казан шәһәре буенча идарәсе җитәкчесе Валерий Красильников сөйләде.

Полиция җитәкчесе сүзләренчә, чемпионатка әзерлек көннәрендә бик зур профилактик эшләр үткәрелгән. Участоктагы полиция хезмәткәрләре 33 мең фатирны карап чыккан, барлык хәрәкәт маршрутлары өйрәнелгән. Республика районнарыннан һәм башка төбәкләрдән дә зур ярдәм күрсәтелгән. Сак хезмәтенә барлыгы 7,5 меңнән артык полиция һәм эчке гаскәрләрнең хәрби хезмәткәрләре җәлеп ителгән.

Оператив хезмәткәрләрнең җайга салынган эш тәртибе нәтиҗәсендә, спорт объектларында, ФИНА дөнья чемпионатында катнашучылар һәм башкала кунаклары яши торган урыннарда җитди очраклар теркәлмәгән. Җинаятьләр арасында телефон һәм ачкыч югалту очраклары теркәлгән, ләкин берничә сәгать эчендә алар хуҗаларына кире кайтарып бирелгән. Шәһәр буенча уртача 50 очрак теркәлгән, кибеттә урлау очрагы шулар арасында төп урынны алып тора, - дип билгеләп үтте Россия Эчке эшләр министрлыгының Казан шәһәре буенча идарәсе җитәкчесе.

Бер очрак полиция хезмәткәрләрендә аеруча зур кызыксыну уяткан. “Иртәнге аш вакытында Бөекбритания гражданинының планшет һәм акчаларын урлыйлар. Видеокүзәтү хезмәте ярдәмендә фоторобот төзелә. Оператив хезмәткәрләренең берсе эшкә барганда “КАИ” тукталышында тышкы кыяфәтләре фотороботка туры килүче ир һәм хатынны очрата. Алар Перу гражданнары булып чыгалар. Чит ил паспортларын тикшергәндә аларның Европа буенча бик күп сәяхәт иткәннәре күренә. Без аларны җинаятьче-гастрольдә йөрүчеләр дип саныйбыз. Алар турындагы мәгълүматлар Интерполга җиткерелде. Перу гражданнары кулга алынды һәм тикшерү изоляторында утыралар”, - дип сөйләде Валерий Красильников.

Дөнья чемпионаты үткән көннәрдә билетлар белән шөгыльләнүче алыпсатарлар Казанда полиция хезмәткәрләренең игътибар үзәгендә булган. “Чемпионатның ачылу тантанасына билет бәяләрен 2-3 тапкыр арттырып саткан очраклар да булды. Синхрон йөзү ярышларына билетлар саткан затлар кулга алынды. Мондый хәлләрнең 5-6 очрагы теркәлгән. Лизенциядән башка гына эшмәкәрлек эшчәнлеге белән шөгыльләнгән 4 кеше кулга алынды”,- дип сөйләде полиция башлыгы.

Шунысын да әйтеп үтәргә кирәк, ФИНА чемпионаты тәмамлануына да карамастан, Казанда полиция хезмәткәрләренең эше бик киеренке Хокук саклау органнары хезмәткәрләре 16-нчы август көнне тәмамланачак “Мастерс” турниры үткән чорда да шәһәр халкы һәм башкала кунакларының иминлеген саклауны тәэмин итәләр. Аннан соң полиция хезмәткәрләре гадәти штат режимында эшли башлый, дип хәбәр итә Казанның рәсми порталы.