Эссегә ничек түзәргә?

Синоптиклар 37 градуска җиткән эсселек белән бергә Татарстанда көчле җил, яңгыр явачак дип әйтә. Яшенле яңгыр вакытында сак булырга кирәк дип кисәтәләр. Кояш аямый: кыздырыпмы кыздыра! Синоптик­лар Татарстанда аномаль кызу көннәр хакимлек итүе турында хәбәр итә. Төнлә һава температурасы 18-23 градус­тан түбән төшми, көндез – 32-37 градус җылы. 20 июнь­дә Казанда иң кызу көн булган, температура 33,5 градус­ка кадәр күтәрелгән. Мондый һава торышы 90 ел элек күзәтелгән – 1925 елда температура 34,7 градус эссе булган.

Моннан тыш синоптик­лар яшенле яңгыр, урыны бе­лән боз яву куркынычы турында әйтә. Көчле җил чыгачак дип кисәтәләр. Кө­чәй­гән вакытта аның тизлеге секундына 15-20, урыны белән 24 метрга кадәр җи­тәчәк. Гарасатка эләк­мәскә тырышырга, сак булырга ки­рәк, ди бел­гечләр.

Бу ялларда Теләче, Саба районнарында давыл чыккан. Сабаның Олыяз авылында көчле җил йорт, абзар тү­бәләрен очырткан, агачларны сындырган. Кайгылы хә­бәр дә бар: Саба районының Татар Икшермәсе авылында бер ир-атны яшен сугып үтер­де. Бу – инде икенче очрак. Узган атнада Әтнәдә шулай ук бер ирне яшен сугып үтерде.Татарстанда чык­кан давыл 25 млн сум күләмендә зыян китергән иде.

Һава торышының артык эссе булуы игеннәргә зыянлы, ди белгечләр. Болай дәвам итсә, уңыш формалашу куркыныч астына куела дигән сүз.
Эссе һава торышы атна азагына кадәр дәвам итәчәк. Синоптиклар, җиңел суларга иртәрәк, ди, кояшның кыздыруы киләсе атнада да сак­ланачак. Табиблар эссе көн­дә кирәкмәгәнгә урамга чыгып йөрмәскә, күбрәк су эчәргә киңәш итә. Ураза то­тучыларга түземле булырга туры килә.