Фитр сәдакасының күләме билгеле булды

2015 елда изге Рамазан ае 18-нче июньдә башланачак, Ураза бәйрәме исә 17-нче июль көнне билгеләп үтелә.

Голәмәләр шурасында фитр сәдакасының күләме билгеле булды, арпа бәясенә карап исәпләгәндә бер кешегә - 100 сум, йөзем бәясенә карап исәпләгәндә 500 сумны тәшкил итәчәк. Сәламәтлек йә башка сәбәпләр аркасында уразаны тота алмаган очракта фидия сәдакасы түләнә, аның күләме - 200 сум, дип хәбәр итә ТР мөселманнары Диния нәзарәте матбугат хезмәте.

Исегезгә төшерәбез, сәхәр вакытын – иртә белән туклануны – кояш чыкканчыга кадәр 2 сәгать кала тәмамларга кирәк. Ястү намазы һәм “Тәравих” намазы (Рамазан аенда укыла торган махсус намаз) кояш баеп 1 сәгать тә 30 минут үткәннән соң укыла. 20 рәкәгатьтән торган тәравих намазы 17-нче июньнән укыла башлаячак.