Китап бәясе арзанаермы?

Дәүләт Думасы Россиягә иң күп укый торган ил статусын кайтарырга хыяллана. Моның өчен китап бастыручыларны өстәлгән кыйммәткә салымнан да (НДС) азат итәргә телиләр.

“Справедливая Россия” партиясе депутаты, Россия Дәүләм Думасының бюджет һәм салымнар комитеты әгъзасы Михаил Сердюк моңа кагылышлы законопроект тәкъдим итә. Канун буенча, китап бастыручылар өчен өстәлгән кыйммәткә салымны киметергә телиләр. Бу исә, үз чиратында, китапларга бәяләрне дә төшерәчәк, дип белдерә “Известия” газетасы документка нигезләнеп.

- Бу ысул электрон китапларга күчү тенденциясен үзгәртмәячәк. Шулай да, бу закон ярдәмендә культура деградациясен туктатырга мөмкин. Без бит иң күп укый торган ил идек. Әгәр ашыгыч карарлар кабул итмәсәк, без иң надан илгә әверелергә мөмкин, – дип саный Михаил Сердюк.

Бастырылган китаплар исемлеге буенча Россия дөньяда – 10 урында, ә тиражлар буенча 30нчы урында тора. Бүгенге “белем чишмә”ләренең санын берничек тә элеккеге 100 меңле тиражлар белән чагыштырып булмый. Россиянең күпмилләтле 140 миллион халкы өчен хәзерге вакыта китаплар берничә генә мең тираж белән бастырыла.

Өстәлгән кыйммәткә салымның (НДС) ставкасы нуль дәрәҗәсенә кую турындагы закон гамәлгә кертелгәннән соң, ул 2018 елның 31 декабренә кадәр үтәлә башларга тиеш. Ташламаны озайту китап продукция базарының нәтиҗәлелегенә бәйле булачак. Искәрмә – бары тик эротик, тылсым-магиягә багышланган продукция, аларга бу норма кагылмаячак.

Милли китап базарының үсеше Россиядә китап сатуның дөнья системасына интеграцияләүне тизләтергә мөмкин. Бүгенге көндә моңа базардагы табышның түбән дәрәҗәсе кебек фактор комачаулый. Бу исә тармактагы хәлнең тотрыклы булмавын күрсәтә. Депутат, үз чиратында, бу закон Россиядә китап бастырырга ярдәм итәчәк дигән фикердә.