“Татмедиа”да китапханә ачылды (ФОТО)

Бүген Татарстан матбугаты көнендә “Татмедиа” бинасының редакция корпусында әдәби салон утырышы узды. Бәйрәм хөрмәтенә кабаттан ачылган китапханә бүлмәсенә “Татмедиа”АҖның генераль директоры Фәрит Шәһиәхметов, аның киңәшчеләре, урынбасарлары, газет-журнал мөхәрирләре килгән иде.

Тантаналы ачылышта Фәрит Шәһиәхмәтов җыелган кунакларны Татарстан матбугаты көне белән котлады, китап абруе хакында фикерләре белән уртаклашты. “Интернет заманында яшәсәк тә, виртуаль китапханәләребез белән мактана алсак та, китапның үзен кулга тотып укуга ни җитә? Заманында безнең бинада китапханә гөрләп эшләде. Шәһсән мин үзем дә ул китапханәдән актив файдалана идем. Бу гадәти генә китапханә түгел. Биредә журналистлар, типографистлар өчен һәм башка махсус әдәбият саклана. Барлыгы фондта 5 меңннән артык китап бар. Аның саны артачак, чөнки безгә китаплар бүләк итә башладылар инде. Татарстан китап нәшрияты мәсәлән 100 китап бүләк итте”, - диде Фәрит Шәһиәхмәтов.

Кунакларны, библиотекага килүчеләрне танылган өлкән журналистыбыз Роза Камалетдинова каршы алды. Роза ханым (танылган язучы Роза Мулланурова) үз архивындагы, шулай ук үз басмаларын да бирегә китергән. “Бу зур тарихлы китапханә. Аның яңадан сафка басуы зур вакыйгага тиң. Китап - ул кеше кебек үк. Ул туа, нәшрияттә басыла һәм укучы укыганда гына яши ала. Адәм балаларына фикер тарата ала, акыл бирә. Китаптан гыйбрәт аласың. Әле дә хәтерлим, без студент чакта, ач булсак булдык, ә менә кибеттән китап алырга акча таба идек. Безнең буын китап кадерен яхшы аңлый. Соңгы вакытта аңа мәхәббәт сүрелгән кебегрәк булды... Китапның үз вазифасы бар. Яшь буында китапханәгә мәхәббәт тәрбияләү ул зур вазифа. Китап укымыйча үскән бала шәхес була алмый”, - диде яңа ачылган китапханә мөдире.

Китапханәдә 1883 елда нәшер ителгән китаплар белән бергә яңа гына табадан төшкән басмалар белән дә танышырга мөмкин. Шәһиәхмәтов ышандырганча, биредә Россия киңлекләрендә чыга торган кыйммәтле басмаларны да алып укырга мөмкин булачак. Бүгеннән китапханәдә “Бүләк итү декадасы” башланды. Теләгән һәр кеше бирегә китап, журналлар китерә ала.

Халык шагыйре Равил Фәйзуллин әйтмешли, җүнле кешенең йортында һәрвакыт китап булган. Равил ага китапханә тарихына тукталып узды: “Безнең “Татмедиа” - абруйлы оешма. Әлеге бинабыз оешуга да кырык елдан артык вакыт узып китте. Бинаның ачылышы елларында ук монда китапханә эшләде. Китапханә - кунак өе кебек бит ул. Гомер бакый биредә кунаклар кабул ителде, язучылар, галимнәр, журналистлар җыелып, фикер алыша иде. “Татмедиа”га китапханә бик кирәк. Киләчәктә дә ул безнең штаб булыр дигән өметтә калам”.

Бүгеннән журналистлар китапханәсе яңа форматта эшли башлады. «Татмедиа» җитәкчелеге белдергәнчә, биредә китап, газет-журналларны өйгә алып торып укырга да мөмкин булачак. Шулай ук, монда ветеран журналистлар, танылган фән, мәгариф, мәдәният эшлеклеләре белән очрашулар оештыру да каралган.

1

2

3

4

5

6

7

8

9

10

11

12

13

14

15

16

17

18

19

20

Солтан Исхаков фотолары.