06.05.2015 Җәмгыять

Матросов батырлыгын кабатлаган Бари Шәвәлиевка бюст ачылды (ФОТО)

Бүген Балык бистәсе районы Югары Тегермәнлек мәктәбендә шушы авылда туып үскән, Бөек Ватан сугышында А.Матросов батырлыгын кабатлаган Шәвәлиев Бари Гани улына бюст ачылды. Тантаналы вакыйгада район хакимияте башлыгы Илһам Госман улы Вәлиев та катнашты.

Шәвәлиев Бари Гани улы 1925 елда Түбән Тимерлек авылында туган. Уналты яшендә ул фронтка китә, фашист илбасарларына каршы канлы сугышларда катнаша. 1944 елның 23 июнендә “Багратион” операциясе барышында Белоруссиядәге Витебск өлкәсенең Осинторф авылы янында барган бәрелештә Бари Шәвәлиев фашист амбразурасын үз тәне белән каплап һәлак була. Бу каһарманлыгы өчен 2нче дәрәҗә Бөек Ватан сугышы ордены белән бүләкләнә.

Сулдан уңга: Мәктәп директоры Илфар Габдрахманов,

меценат Фәрит Хәсәнов, каһарман сугышчының энесе Габделвәли Шәвәлиев,

Балык Бистәсе районы башлыгы Илһам Вәлиев,

Бари Шәвәлиевнең сеңлесе Рахилә апа.

Батыр татар егетен язучы Шамил Рәкыйпов “Чәчәкләр сөйли белә” әсәрендә мәңгеләштергән. Шәвәлеев исемен Казан урамнарының берсе йөртә.

Бари Шәвәлиев турында тарихи материалларны туплауда директор Габдрахманов Илфар Габделхәй улы җитәкчелегендә Югары Тимерлек мәктәбе зур хезмәт куя. Мәктәп музеенда каһарман якташларына багышланган бай гына күргәзмә тупланган. Директор башлангычы һәм меценатлар ярдәмендә мәктәп ишегалдында Бари Шәвәлиевның бюсты яңартылды да инде. Элекке бронза бюст таушалган иде инде. Яңаны исә шушы авылда туып үскән, хәзер Тольятти шәһәрендә яшәүче эшмәкәр Фәрит Рәшит улы Хәсәнов ясаткан.