РАМАЙ: МИН ТАТАРЧА "БЛА-БЛА-БЛАМ"!

Казанда һәм Мәскәүдә "Мин татарча сөйләшәм" акциясенә әзерләнгәндә "абыстайлар куерып" алган. "Шәрык" клубында яңа пәйдә булган лидер Рамай (Рамил Фәхерлиев) 25 апрель көнне "Мин татарча бла-бла-бла" дигән шаян яки үзиронияле чара ясарга булган. Кайберәүләр монда мыскыллау күргән. Шаян Рамай исә: "Мин татарча сөйләшмим. Мин татарча бил бөгәм", -дип тел шартлата.

Шаян "Аулак өй"

"Әни уятканчы татарча йокы симертәм, ашарга булса татарча ашыйм, аннары татарча чәй эчәм, "вконтакте" аша кызларга татарча "сакал тегәм". Һәр көнне! Ике айга бер татар дискәтүкләренә барып, сыра чөмерәм. Кайвакытны татарча соранып, өй эшләрен күчерәм дә, вакыт булганда универга барып кайтам. Укытучыларның дачасында татарча бура күтәрәм, комсызларына татарча итеп әтинең акчасын төртәм!" - ди "Шәрык"тагы шаян "Аулак өй" (шимбә) проекты хуҗасы Рамай.

Елга бер "мин татарча сөйләшәм"

Жор телле Рамай елга бер тапкыр гына "мин татарча сөйләшәм", дип тә өсти. "Үзебез" түтиләре, шуны бер көн генә түгел, 365 көн ясый алмыймы сон? Үтенеп сорыйм! Минем һәр көнне татарча сөйләшәсем килә бит!" - дип шаярта ул.

Даими чаралар юк

"Көн саен Бауман урамында матур "Чәк-чәк-патины" ясауны да сорыйм. Көн саен альтернатив татар музыкасы кичәләрен дә ясасыннар иде. "Татарлар" дискотекасына да көн саен кызларны йөртергә ризамын. "Кызган таба"ны да ишектән кусалар, культура учакларына тишектән керсен: көн дә биисе килә. "Үзәк-пати" да беркөнне дә туктамасын! "Крылья", "Оут-Холл", "Пирамида" да көн саен татарча эшләсен иде. Көн саен "Тюлпан-патины" көтәм. "Аншлаг"та "Тамаша.ру" көн саен эшләсен иде! "Арена"да һәр көнне татарча бию мөмкинлеге булсын!" - ди ул. Ягъни ул чараларның бер тапкыр гына ясалуына, газета битләрендәге PR булып кына калуына, халык өчен даими оештырылмавына аптырый.

Өч милләтчегә милли лекция нигә?

"Туа башлаган "Азатлык" берлегенә дә "бла-бладан" туктарга, эшли башларга кирәк. Болай да милли җанлы өч кеше өчен генә лекцияләр ясап газапланганчы, Казандагы 300 мең йортка, 30 мең подьездка, мәктәпкә, оешмага кереп маңкортлар арасында эш алып барырга чакырам", - дип язган Рамай.

Мәскәүдә "Мин татарча сөйләшәм"

Бу көннәрдә клубта "Мин татарча җырлыйм", "Мин татарча ди-джейлыйм" кебек кичәләр ясалган. Казанның Бауман урамында узачак чарага да әзерләнә башланганнар һәм Россиядә татар теле дәүләт теле булсын, дип имзалар туплаганнар. Тик 26 апрель көнне "Мин татарча сөйләшәм" акциясен оештыручы "Үзебез" вәкилләре "Шәрык"не "сатлыкҗанлылыкта", мөһим чарадан качып китүдә гаепләгән. Баксаң, бу клубтан бер төркем 25 апрель көнне Казаннан китеп, Мәскәүдә "Мин татарча сөйләшәм"не оештыра икән. Әмма алар Мәскәүдән 26 апрель көнендәге Казандагы чарага да кайтып җитәргә тели, ди.

"Үзебез"не яклап

Рамай: "Без көн саен татарча сөйләшүче чаралар ясыйбыз. Елга берничәне генә ясаучыларның кемнеңдер Мәскәүгә барып кайтуын гаепләве урынсыз. Күпчелек Казанда кала бит. Безнекеләрнең андый акциядә, тәрбиядә ихтыяҗы юк, әлбәттә. Әмма барыбер Баумандагы бәйрәмдә катнашабыз, "Үзебез"не яклап",- ди.