27.03.2015 Җәмгыять

Дустыбыз, каләмдәшебез Алсу Хәсәновага ярдәм итик!

Бәла көтелмәгәндә генә килә. Каләмдәшебез Алсу Хәсәнова да гөрләтеп эшләп йөргән арада чирләде дә китте. Табиблар яман чир диагнозын куйды. Алсу авырый башлаганнан соң барыбыз да күңел тынычлыгын югалтты. “Ватаным Татарстан” газетасы редакциясе – зур гына бер гаилә һәм Алсу шушы гаиләнең сөекле бер кызы.

Шуңа күрә һәр иртәбез: “Алсуның хәле ничек икән?” – дигән сүзләрдән башланып китә. Ә хәлләре бик үк әйбәттән түгел шул. Ул инде чире белән бер елга якын көрәшә. Республика җитәкчелеге, аерым алганда, ул чактагы Президентыбыз Р.Миңнеханов ярдәме белән Германиягә дә барып кайтты Алсу. Дәвалауга үз өлешләрен керткән өчен Татарстанның иҗат-сәнгать коллективларына да зур рәхмәт. Әмма яман чир бик чигенергә уйламый. Алсу – нык кеше, елдан артык вакыт эчендә күп операцияләр кичерсә дә, сер бирми. Бездән калышмый, кайчак бездән уздырып та эшли, шаярта, уйный, көлә. “Барыбер тереләм мин, Алла боерса”, – дип әйткәләп, чир белән көрәшә. Тормышка үҗәтләнеп ябышкан ул.

Өмет утын сүндермәс өчен без дә кулдан килгәнне эшләргә тырышабыз, әмма “зур явызлык”ка каршы көрәштә сезнең дә ярдәмегез кирәк, шуңа күрә сезгә мөрәҗәгать итәргә булдык. Алсуыбызны дәвалауны дәвам итү өчен кирәкле сумманы бергәләп җыеп карыйсы иттек. Хыял буш булмасын өчен, аны бергә-бергә тормышка ашырасы иде. Күңелдә соңгы өмет калды дияргә мөмкин. Ә кешене исә өмет яшәтә.

Алсуның хәленә керергә теләүчеләр акча күчермәсме дип өметләнеп, счет та ачтык. Изгелек кылудан тартынып тормыйк, кулдан килгәнчә ярдәм итик, Алсуның терелеп аякка басуын теләп догада булыйк. Алсу исә – яшь кеше, аңа яшисе дә яшисе.

Матди ярдәм итәргә теләүчеләр өчен исәп-хисап счеты:

Счет в Сбербанке России: отделение “Банк Татарстан” №8610

Счет получателя: 40817810862000487614, БИК: 049205603

Кор. счет: 30101810600000000603

Код подразделения Банка по месту ведения счета карты: 4286100664

Счет Алсуның апасы Лилия Хәмит кызы Гатиятуллина исеменә ачылган. Телефон аша да акча күчерү мөмкинлеге бар:

МТС – 89178793444, “Мегафон” – 89274088837,

“Билайн” – 89050242479

Ватаным Татарстан
№ 43 | 27.03.2015